iklan

EKONOMIA, BOBONARO, HEADLINE, MUNISÍPIU, SAÚDE

Saúde Bobonaro propoin projetu hitu iha PDIM 2024

Saúde Bobonaro propoin projetu hitu iha PDIM 2024

Diretór Servisu Saúde Munisípiu Bobonaro, João Barreto Cardoso. Imajen Tatoli/Sérgio da Cruz.

BOBONARO, 09 outubru 2023 (TATOLI) – Diresaun Servisu Munisipál Saúde, Munisípiu Bobonaro, propoin ba nasionál projetu hamutuk hitu atu konstrui no reabilitasaun iha Programa Dezembolvimentu Integradu Munisipál (PDIM) tinan fisikál 2024.

Diretór Servisu Munisipál Saúde, João Barreto Cardoso, esplika, projetu infraestrutura saúde hirak-ne’e fahe ba kategoria konstrusaun foun postu saúde unidade tolu no unidade haat reabilitasaun.

Notísia relevante: Ministériu Saúde presiza estabelese postu saúde iha Tapo

“Postu saúde tolu ne’e ida iha Molop, Tapo no postu saúde ida iha Corluli no Mole-Anan nia leet sira-ne’e, restu iha Saburai ita halo reabilitasaun, depois maternidade Cailaco no projetu rua tán mak halo reabilitasaun,” nia informa ba jornalista sira iha Maliana, segunda ne’e.

Diretór ne’e subliña, proposta iha setór saúde ne’e autoridade munusipál Bobonaro submete ona ba nasionál, maibé atu implementa ka lae depende ba alokasaun orsamentu jerál estádu 2024 hosi governu.

“La signifika katak hitu ne’e sei hetan aprovasaun hotu, depende ba orsamentu hosi nasionál mai munisipiu ba osamentu 2024, fahe ba mak hitu ne’e bele kobre hotu, ita agradese, maibé dalaruma bele to’o tolu ka haat de’it,” nia subliña.

Nia dehan, servisu munisipál saúde Bobonaro mós hetan projetu rua hosi nasionál, ne’ebé daudaun ne’e hein hela aprovasaun hosi Konsellu Administrasaun Fundu Infraestrutura (CAFI, sigla portugés).

Nia hatutan, projetu rua ne’e ida postu saúde iha suku Lontas, postu administrativu Lolotoe no ida fali postu saúde Mazop, suku Ai-Asa, postu administrativu Bobonaro.

“Projetu rua ne’e ninia BOQ no dezeñu kompletu hotu ona, hein aprovasaun hosi CAFI, parese ke buat hotu la’o ho di’ak, ha’u hanoin inísiu 2024 bele hahú ona,” nia katak.

Maibé nia dehan, ho projetu hirak-ne’e nafatin seidauk bele kobre fasilidade saúde iha territóriu munisípiu Bobonaro.

“Idealmente kada suku tenke iha ninia postu saúde rasik, ita 50 suku maibé fasilidade saúde, ne’ebé ita iha agora 37, signifika sei falta 13 suku ida mak seidauk fasilidade saúde,” nia katak.

Enkuantu tuir dadus 2022 munisípiu Bobonaro iha aldeia 193, suku 50, postu administrativu neen ho totál populasaun 106,543 ho totál xefe família 20,802.

Notísia relevante: Abitante Mazop-Laho halerik ba eletrisidade no saúde

Jornalista   : Sérgio da Cruz

Editór          : Evaristo Soares Martins

iklan
iklan

Leave a Reply

iklan
error: Content is protected !!