BOBONARO, 18 jullu 2023 (TATOLI) – Xefe suku Tapo, postu administrativu Bobonaro, munisípiu Bobonaro, Xavier Barreto Cardoso, husu Governu estabelese postu saúde iha suku ne’e hodi hakbesik atendimentu saúde ba komunidade sira iha baze, tanba autoridade suku identifika ona rai própriu.
Notísia relevante: Xefe suku Tapo husu MSSI konsidera reklamante 25 iha subsídiu $200
“Ami-nia problema sosiál mak parte saúde nian, ne’ebé ha’u hanoin presiza hari postu saúde iha ne’e, tanba suku ne’e sai hanesan sentru ba suku rua. Ida Leber no ida suku Oe-leu, no aldeia sira-ne’ebé besik, hanesan aldeia Laho, suku Ai-Asa, parte Oeleu, aldeia Mologen no parte Maliana, Pipgalak II, sira bele konsentra iha-ne’e. Ha’u hanoin atendimentu urjente sira labele ba fatin dook,” nia informa ba Tatoli, iha suku Tapo, tersa ne’e.
Tuir nia, durante ne’e komunidade sira-ne’ebé moras atu halo tratamentu ba sentru saúde Bobonaro no postu saúde Bucuk, suku Leber tenke la’o ho distánsia ne’ebé dook tebes. Situasaun ne’e difikulta tebes idozu sira ne’ebé besik atu partu.
“Ha’u hanesan autoridade suku kontaktu direita ba postu saúde, nune’e karreta atu atende situasaun emerjénsia tenke to’o lalais iha fatin. Sé lae dalabarak ona ha’u komunidade ida ladún todan liu ne’e, ha’u xefe suku atende direita sira, transporta ba iha postu Bobonaro ho ha’u-nia motorizada rasik, tanba sira presiza hetan tulun emerjénsia, ida-ne’e akontese dala-rua ona,” nia dehan.
Ermelinda dos Santos nu’udar abitante aldeia Oepho, suku Tapo, dehan, Governu presiza tau prioridade, tanba iha tempu udan difikulta sira atu ba konsulta iha Bobonaro no postu saúde Leber.
“Ami atu ba to’o iha-ne’ebá ne’e dalaruma, moras la’ós atu di’ak, maibé aumenta tán de’it, tanba ita sai hosi uma udan kona bokon kedas ona, ne’ebé sé bele boot sira tau ospitál ida-ne’e ami labele la’o dook ona,” nia fó hanoin.
Enkuantu planu atu estabelese postu saúde iha suku ne’e, xefe suku Xavier hato’o ona autoridade munisípiu liuhosi reuniaun konsellu konsultivu suku, atu tau iha prioridade tinan tuir mai.
Nune’e mós rai ne’ebé atu estabelese postu saúde mós autoridade suku indentifika ona rai própriu besik sede suku no fatin seluk ne’ebé ho espasu sufisiente atu harii fasilidade saúde refere.
Entretantu suku Tapo iha aldeia rua, komposta hosi aldeia Tapo no Oepho ho totál populasaun 975, uma-kain 245.
Notísia relevante: PR apoia klínika Madre Cecilia dos Santos iha Tapo-Memo
Jornalista: Sérgio da Cruz
Editór: Evaristo Soares Martins
