BOBONARO, 01 dezembru 2022 (TATOLI)-Xefe suku Tapo, postu administrativu Bobonaro, munisípiu Bobonaro, Xavier Barreto Cardoso, husu Ministériu Solidariedade Sosiál no Inkluzaun (MSSI) atu konsidera lista família reklamante na’in-25 iha subsídiu ‘fim do Ano’ ho valor $200.
Xefe suku Tapo ne’e esplika, agregadu familiár ne’ebé iha tinan kotuk hetan subsídiu iha ámbitu pandemia Covid-19 hamutuk 250 komposta hosi aldeia Tapo no Wepho.
Tanba iha família reklamante kuaze 25 mak la konsege simu sira-nia direitu no foin lalais lista ne’ebé nasionál haruka mai suku halo verifikasaun mos la inklui fámilia hirak-ne’e.
Xefe suku la halo promesa ba reklamante hirak-ne’e, maibé kontinua ezize atubele hetan sira-nia direitu iha atribuisaun subsídiu ne’e.
Notísia relevante: Membru família ho rendimentu mensál $501 labele simu subsídiu $200
Lideransa komunitária ne’e konsidera programa Governu atribuisaun subsídiu $200 no cesta bázika fó vantajen ba komunidade tanba bele responde ona sira-nia nesesidade.
“Ami hanesan liman-ain estadu nian iha kraik, preparadu hala’o orden Governu nian iha kualkér programa ne’ebé tama iha suku laran,” nia katak.
MSSI sei hahú selu iha fulan-dezembru ba ba uma-kain sira no tuir dadus hosi Ministériu Administrasaun Estatál (MAE) família timoroan 400.000-resin mak sei sai hanesan benefisiáriu ba subsídiu fim do ano $200 ne’e.
Notísia relevante: Sentru Solidariedade Bobonaro rejista xefe família 28.553 atu asesu subsídiu $200
Jornalista: Sérgio da Cruz
Editór: Evaristo Soares Martins
