DILI, 17 novembru 2022 (TATOLI)–Koordenadór Jerál Unidade Kooperasaun, João Coimbra, hateten subsídiu $200 fim do ano ba uma kain ne’e, bainhira membru família ida-nia rendimentu mensál $501 ne’e husu lalika ka labele simu no presiza família nia konxiénsia hodi rezeita.
Notísia Relevante: Semana ne’e, MSSI-MAE sei asina diploma ministeriál ba subsídiu $200
“Tanba ne’e, ha’u husu ajuda ba mídia atu pasa mensajen liga ho pagamentu subsídiu $200 ba ita-nia públiku sira katak subsídiu ne’e previstu ba família, karik membru família ida mak ninia rendimentu ne’e kada mensál $501 ba leten, automatikamente husu mós konxiénsia atu rezeita tiha pagamentu ne’e, lalika simu, mezmu xefe família la servisu,” João Coimbra hateten ba Agência Tatoli, liuhosi telefónika, kuarta (16/11) ne’e.
Tanba, tuir nia, subsídiu $200 ba uma kain ne’e nia karáter ne’e la’ós ba individu ka xefe família maibé ba família iha fixa família ne’e.
Iha dekretu-lei 37/2022, artigu 2 ne’e hateten katak família ne’ebé sai benefisiáriu ne’e ninia membru ida mak nia rendimentu liu ona $500 ne’e labele simu.
Notísia Relevante: PR Horta promulga Dekretu-Lei subsídiu “fim do ano” $200
Jornalista : Osória Marques
Editór : Cancio Ximenes
