DILI, 16 novembru 2022 (TATOLI)—Koordenadór Jerál Unidade Kooperasaun, João Coimbra hateten, se posivel semana ne’e, Unidade Legál Ministériu Solidariedade Sosiál no Inkluzaun (MSSI) ho Ministériu Administrasaun Estatál (MAE) nian sei asina diploma ministeriál ba subsídiu $200 ba família rendimentu kiik sira.
Notisia Relevante: Kalendáriu pagamentu subsídiu $200 seidauk fiksu
“Kona-ba diploma ministeriál ne’e unidade legál hosi MAE ho MSSI sei haree hela. Se posivel, semana ne’e tenke asina para ita prosede, ne’ebé sei iha unidade legal nia liman. Maibé, ha’u fiar MSSI ho MAE sei asina,” João Coimbra hateten ba Agência Tatoli, liuhosi telefónika, kuarta ne’e.
Nia garante katak semana ne’e asina, nune’e semana oin bele implemnta programa ne’e tanba haree ba tempu ne’e la to’o.
Antes ne’e, Governu liuhosi reuniaun Konsellu Ministru halo ona alterasaun dahuluk ba dekretu-lei númeru 37/2022, loron 25 maiu, kona-ba subsídiu fim do ano ba ‘uma kain’ ho valór $200 hodi klarifika ba aplikasaun, ne’ebé antes ne’e uma kain hotu iha territóriu tomak sei sai benefisiáriu maibé ho alterasaun dekretu-lei ne’e, mak atribuisaun ba de’it uma kain ne’ebé nia membru nia saláriu mensál la liu $500.
Daudaun ne’e, Ministériu Administrasaun Estatál (MAE) submete ona dadus uma kain 39.000 ba MSSI ho totál pagamentu millaun $7,8-resin.
Jornalista : Osória Marques
Editór : Cancio Ximenes
