DILI, 15 novembru 2022 (TATOLI)–Diretór Jerál Administrasaun no Finansa Ministériu Solidariedade Sosiál no Inkluzaun (MSSI), Rui Manuel Gago Exposto, informa, kalendáriu ba pagamentu subsídiu fim do ano $200 ba uma-kain seidauk fiksu.
“Kalendáriu ba pagamentu seidauk klaru tanba Prezidente Repúblika foin mak promulga no publika dekretu-lei ne’ebé Konsellu Ministru foin lalais halo alterasaun, nune’e tékniku sira tenki halo preparasaun lai ba dekretu-lei ida halo revizaun, bainhira ramata ona maka ami sei informa ba públiku liuhosi mídia kona-ba kalendáriu pagamentu, maibé agora seidauk,” Diretór Jerál Administrasaun no Finansa relata ba Agência Tatoli via telefónika, tersa ne’e.
Nia dehan, previzaun ba pagamentu seidauk iha tanba sei hadi’a fali diploma ministeriál konjunta ne’ebé MSSI no Ministériu Administrasaun Estatál (MAE) sei asina hamutuk.
Notísia relevante: Benefisiáriu subsídiu $200 tenke deklara rendimentu mensál la liu $500
MSSI antes ne’e planeia ona halo abertura atribuisaun subsídiu $200 iha loron 16 novembru 2022, maibé daudaun kalendáriu sei iha koordenasaun.
“Entaun presiza tempu oitoan. Banku Nasionál Komérsiu Timor-Leste (BNCTL) ne’e ajuda MSSI atu transporta de’it osan to’o iha postu administrativu, la’ós BNCTL mak atu realiza. Pagamentu ba subsídiu ne’e la’o nafatin hanesan uluk COVID-19 nian, ne’ebé atu dehan katak loron kuarta (16/11) ne’e seidauk bele halo pagamentu,” nia akresenta.
Tuir Diretór, seidauk bele divulga informasaun katak sei posível halo pagamentu iha fulan-novembru ka dezembru nia laran tanba seidauk klaru.
Antes ne’e, Governu liuhosi reuniaun Konsellu Ministru, halo ona alterasaun dahuluk ba dekretu-lei númeru 37/2022, loron 25 maiu, kona-ba subsídiu fim do ano ba ‘uma-kain’ ho valór $200 hodi klarifika ba aplikasaun, ne’ebé antes ne’e uma-kain hotu iha territóriu tomak sei sai benefisiáriu maibé ho alterasaun dekretu-lei ne’e, maka atribuisaun ba de’it uma-kain ne’ebé nia membru nia saláriu mensál la liu $500.
MAE submete ona dadus uma-kain 39.000 ba MSSI ho totál pagamentu millaun $7,8 resin.
Jornalista : Antónia Gusmão
Editora : Julia Chatarina