OEKUSI, 17 Fevereiru 2025 (TATOLI) – Primeiru-Ministru, Kay Rala Xanana Gusmão, segunda ne’e, hala’o vizita iha Rejiaun Administrativa Espesiál Oekusi Ambeno (RAEOA) ho objetivu atu observa progresu serbisu no funsionamentu administrasaun, liga dezenvolvimentu no prestasaun servisu Autoridade RAEOA nian.
Xefe Governu to’o iha fronteira Sakato iha tuku 11:30, ne’ebé simu direita husi Prezidente Autoridade RAEOA, Rogério Tiago Lobato, ho membru Autoridade inklui ekipa husi Komisaun Zona Ekonómia Espesiál Dezenvolvimentu Oekusi Ambeno (ZEEDOA) lideradu husi, João Mendes Gonçalves.
Hafoin simu no tara-tais, Lia-na’in sira husi suku 20 simu xefe Governu ne’e ho lia-dadolin “Takanab” no tebe-tebe “sboot” bidu tradisionál.
Biban ne’e, Prezidente Komisaun Organizadora, Atuál Sekretáriu Rejionál ba Asuntu Administrasaun, Andre Lao, relata, Primeiru-Ministru, Kay Rala Xanana Gusmão, iha Oekusi durante semana ida ho objetivu atu hala’o enkontru ho Prezidente Autoridade RAEOA, Komisaun Zona Ekonómia Espesiál Dedenvolvimentu Oekusi Ambeno (ZEEDOA), funsionáriu no xefe suku sira inklui hala’o vizita ba projetu sira.
“Ita-nia Primeiru-Ministru hamutuk ho povu Oekusi, durante semana ida, ne’ebé hahú iha segunda ohin sei viajén fila-fali ba Dili iha sesta semana ne’e. Objetivu husi vizita ofisiál ne’e, atu observa progresu serbisu no funsionamentu administrasaun iha Oekusi, liga dezenvolvimentu no prestasaun servisu Autoridade RAEOA nian”, ” nia informa ba Ajénsia TATOLI,I.P iha Oekusi, ohin.
Tuir ajenda ne’ebé Ajénsia TATOLI, I.P, iha segunda 17 Fevereiru 2025, Primeiru-Ministru sei hala’o enkontru durante oras ida ho Prezidente Autoridade RAEOA no Sekretáriu Rejionál sira hotu iha salaun Gabinete Prezidente Autoridade Oébau no kontinua hala’o enkontru ho ekipa Komisaun Zona Ekonómia Espesiál Dezenvolvimentu Oekusi Ambeno (ZEEDOA). Aleinde kontinua hala’o reuniaun ho funsionáriu no xefe suku 20 iha otél Ameno.
Iha loron tersa, 18 Fevereiru 2025, tuku 08 to’o tuku 11:00, Primeiru-Ministru sei hala’o vizita ba Sekretáriu Rejionál sira hotu, no iha tuku 11:00 halo lansamentu ba sistema dijitalizasaun saúde RAEOA.
Iha sesaun lorokraik tuku 15:30 Primeiru-Ministru sei hala’o enkontru ho Padre, Madre no oan-ki’ak sira iha salaun parókia igreja Padia’e, iha tuku 16:30 kontinua hala’o vizita ba kuartél F-FDTL Sikone, Kuartél PNTL no edifisíu administrasaun públika RAEOA.
Loron Kuarta, 19 Fevereiru 2025, Primeiru-Ministru sei hala’o vizita projetu estrada iha suku Taiboko sub-rejiaun Pante Makasar no kontinua ba sub-rejiaun Nítibe suku Usitako to’o suku Bene-Ufe aldeia Lamasin no Nefolete.
Iha loron Kinta, 20 Fevereiru 2025, Primeiru-Ministru sei hala’o fali vizita ba projetu estrada iha sub-rejiaun Oésilo, estrada husi Tono ba Oésilo no kontinua ba sub-rejiaun Pássabe, depois kontinua fali ba estrada sira iha Tumin, Hau-Ana, Ponte-Bitopa, kontinua ba ponte foun Oébaha.
Iha loron Sesta, 21 Fevereiru 2025, parte dadeersan Primeiru-Ministru sei hala’o observasaun ba funsionamentu barrajén Tono no kontinua vizita ba rezidénsia Fulolo, no kontinua hala’o vizita ba aeroportu Rota do Sândallo, no iha lorokraik Xefe Governu sei viajén fila-fali ba Dili ho aviun Aero Dili.
Jornalista: Abílio Elo Nini
Editór: Florencio Miranda Ximenes
