KOVALIMA, 20 fevereiru 2025 (TATOLI) – Ministériu Administrasaun Estatál (MAE) liuhusi Diresaun nasionál apoiu administrasaun suku (DNAAS) distribui ekipamentu informátiku hanesan komputadór ho marka HP ba lídér lokál 30, postu administrativu hitu hodi fasilita servisu iha munisípiu Kovalima.
“Munisípiu Kovalima ita koloka ekipamentu informátika unidade 367. Husi númeru ne’e, komputadór 30 distribui ba autoridade suku sira no komputadór hitu distribui ba postu administrativu hitu hodi halo dijitalizasaun no moderniza servisu livru 18 iha administrasaun suku”, Diretór DNAAS MAE, Celestino Marques informa hafoin distribui komputadór iha rezidente AMC, ohin.
Dijitaliza servisu atu hatama livru 18, monografia no demografia iha sistema integradu jestaun Suku no Aldeia nune’e bele asesu dadus ne’ebé ho atualizadu kada fulan bele ajuda Governu lokál no Governu sentrál bainhira prepara proposta orsamentu.
MAE distribui komputadór ho intensaun atu fasilita servisu iha suku no postu administrativu sira ne’ebé ho nia regra klaru no proibidu uza komputadór hodi hala’o atividade sira seluk hanesan halo atendementu administrasaun suku no seluktan.
Nia fó hanoin atu halo atendimentu administrasaun iha suku uza komputadór ne’ebé mak molok autoridade munisípiu distribui ona ba suku sira. Komputadór ne’ebé MAE distribui ne’e Sekretáriu suku no ofisiál asuntu sosiál mak responsabiliza hodi operasionaliza komputadór referidu.
Kona-ba atu operasionaliza sistema bainhira hasoru problema ba dahuluk kontaktu postu nune’e administradór postu bele kontaktu ofisiál IT iha postu administrativu nune’e bele fó asisténsia tékniku ba komputador .
Diretór ne’e rekoñese maske distribui ona komputadór maibé hasoru difikuldade atu asesu ba rede internet; iha suku no postu balun asesu rede ho di’ak, balun seidauk, tan ne’e MAE orienta ona IT sira dezeña proposta submete ba ministru atu solusiona.
Bazeia ba dadus MAE sosa komputadór hamutuk unidade 3,530, balun distribui ba suku no balun distribui ba postu administrativu iha territóriu Timor-Leste uza Orsamentu jerál Estadu 2024 maibé nia parte la hatene montante hira hodi sosa komputadór marka HP.
Enkuantu, Prezidente Autoridade Munisípiu (PAM), Kovalima, Miguel Armada Cardoso, fó hanoin ba sekretáriu suku atu operasionaliza komputadór ho di’ak, bainhira nia parte halo vizita dadus populasaun no dadus livru 18; dadus mudansa populasaun, dadus projetu no seluktan hatama (entry) ona iha komputadór.
“Ita-boot sira uza komputadór labele rai imajen la diak sira no imajen sira komputadór ne’ebé simu foku atu entry dadus iha postu mai iha munisípiu hodi tau iha portál munisipál tan ne’e ita sei konstrui edifísiu portál” nia dehan.
Jornalista:Celestina Teles
Editór: Rafael Ximenes de A. Belo
