DILI, 25 Fevereiru 2025 (TATOLI)—Vise-Ministru Fortalesimentu Institusionál Saúde, José dos Reis Magno, informa parte Ministériu Saúde (MS) garante atendimentu saúde ba jogu Komunidade Nasaun Lian Portugés (CPLP-sigla portugés) ne’ebé sei akontese iha Timor, fulan-jullu, tinan ne’e.
“Ekipa atleta CPLP sira durante semana rua iha-ne’e. Ami halo hela esforsu tomak atu garante atendimentu saúde ba atleta sira. Ami mós hakarak hatene otél no fatin eventu sira-ne’ebé maka disponível atu ami bele koloka profisionál saúde sira iha área sira-ne’e,” José dos Reis dehan ba jornalista sira hafoin enkontru ho Komisaun Apoia Téknika CPLP nian iha Palácio das Cinzas, Kaikoli, tersa ne’e.
Governante ne’e garante, ekipa saúde timoroan preparadu, tanba iha ona esperiénsia hodi atende sarani sira iha vizita Papa Francisco iha tinan kotuk no ekipa delegasaun estranjeiru, nune’e MS sei koopera ho parseiru sira hanesan Organizasaun Mundiál Saúde no Cruz Vermelha de Timor-Leste hodi hala’o servisu ba eventu ne’e.
Notísia relevante: Jogu CPLP: membru CTA no diretór CPLP sira vizita Timor-Leste
Nia hatutan, ekipa MS prepara hela postu saúde husi aeroportu to’o iha pontu ka fatin ne’ebé eventu sira-ne’e sei akontese.
“Ami sei haree ba forsa traballa no halibur forsa sira hodi koloka sira iha pontu sira-ne’ebé atleta sira movimenta durante jogu. Ami sei garante atendimentu oras 24 nia laran iha otél sira ne’ebé atleta sira hela ba,” nia dehan.
Vise-Ministru Fortalesiementu ne’e mós garante katak Banco de Sangue iha Hospital Nacional Guido Valadares mós iha pakote raan ne’ebé sufisiente.
“Ha’u husu tiha ona ba profisionál saúde sira iha Banco de Sangue, maibé pakote raan ne’e sufisiente,” nia hateten.
Iha fatin hanesan, membru Ekipa Komisaun Téknika ba apoiu jogu CPLP, António da Luz garante katak ekipa atleta ne’e sei akompaña husi ekipa médika ida husi nasaun membru CPLP idak-idak.
“Ita hatene katak sira sei lori ekipa médika no mai halo monitorizasaun ba atleta sira ho sertifikasaun atleta nian,” nia konklui.
Jornalista: Felicidade Ximenes
Editór: Xisto Freitas da Piedade
