DILI, 22 Fevereiru 2025 (TATOLI) – Komisaun Téknika Akompañamentu (CTA, sigla portugés) husi Organizasaun Jogu Komunidade Nasaun sira Ko’alia Língua Portugeza (CPLP) no Diretór-Jerál Desportu CPLP vizita Timor-Leste husi loron 22 Fevereiru to’o 01 Marsu.
Ho vizita ne’e maka membru CTA, António da Luz, husi Angola, to’o ona ohin iha Timor-Leste no membru sira seluk sei to’o aban hodi prepara ba edisaun 12.a Jogu CPLP ne’ebé sei realiza iha Jullu tinan ne’e.
“Programada ona iha semana ida-ne’e semináriu ho xefe komisaun sira no diretór-jerál [desportu] sira husi CPLP. Ita sei organiza Jogu ho forma posivel. Ami husi Komisaun Téknika iha loron hirak ne’e nia laran vizita resintu desportivu no otél sira. Ami sei serbisu ba iha programa jogu nian no defini regulamentu sira. Nasaun membru [CPLP] hotu sei mai no ita sei aprova regulamentu jogu sira. Ita bele dehan semana ida ba serbisu iha kampu no administrativu”, António da Luz informa ba jornalista sira, iha Aeroporto Internasionál Nicolau Lobato, Dili.
António da Luz adianta katak diretór-jerál desportu CPLP sira mós sei marka prezensa hodi foti desizaun no medida no sei halo preparasaun ba reuniaun ministru sira ne’ebé prevista iha Jullu.
“Sei iha enkontru entre Komisaun Organizadora Lokál no membru Komisaun Téknika ba Apoiu atu defini buat ne’ebé sei aborda iha semináriu husi xefe komisaun no reuniaun diretór sira. Ita sei halo revista ba buat hotu ne’ebé ita iha, dokumentasaun sira, regulamentu no organograma jogu nian atu ita prepradu ba informasaun sira atu pasa ba xefe misaun no meza traballu ba diretór sira ne’ebé mai hotu ona iha ne’e hodi tuir reuniaun iha loron 25, 26 no 27”, dehan.
Membru ne’e fó hanoin hikas katak, iha Abríl tinan kotuk, CTA mai ona iha Timor-Leste hodi organiza reuniaun hodi prepara ba jogu. “Agora, ita konsolida buat ne’ebé ita aborda iha tinan kotuk. Xefe misaun sira sei lori orientasaun relasiona ho preparasaun atleta sira ba jogu no diretór sira mós sei serbisu tuir sira-nia nivel no espera katak depois mai fala iha jullu, ita sei hasoru malu loron ida antes ba jogu”.
Husu kona-ba atleta husi Agola na’in hira mak sei mai Timor-Leste, António da Luz hateten katak sei iha 101 atleta, tékniku no dirijente sira.
Jogu CPLP hanesan akontesimentu multidesportivu ida ne’ebé envolve Estadu-membru sira husi organizasaun nian. Maske konseitu atu hanesan ho Jogu Luzofonia, iha kompetisaun ne’e permite de’it atleta ho idade menus husi 16. Kompetisaun ne’e atu reforsa solidariedade entre sidadaun sira husi país partisipante.
Entre modalidade desportiva iha Jogu CPLP ne’e mak hanesan andeból, atletizmu, atletismu ba portadór defisiénsia, basketeból, futeból, ténis no voleiból praia. Kompetisaun ne’e hahu iha 1992 iha Portugál, husi ne’ebá realiza primeira edisaun.Hahú husi ne’ebá realiza ona jogu hamutuk edisaun 11, rua husi Portugál, Kabu Verde, Angola no Mosambike, Giné-Bisau, Brazíl no Saun Tomé no Prínsipe ida-idak. Edisaun ikus ne’e iha 2018 iha Saun Tomé no Prínsipe.
Oráriu vizita CTA no diretór CPLP sira
Iha loron 22 no 23 Janeiru, membru CTA ba Jogu CPLP to’o Timor-Leste no iha loron 24, enkontru traballu CTA ho Komisaun Organizadora Lokál no Unidade Téknika Liña Ministeriál, lideradu husi Sekretáriu Estadu Arte no Kultura. Sei halo mós vizita ba instalasaun desportiva no otél sira.
Iha loron 25, reuniaun CTA ho parte Ministériu Saúde, Ministériu Interiór, ne’ebé inklui Komandante PNTL, Xefe Imigrasaun no Sekretáriu Estadu Protesaun Sivíl. Iha mós reuniaun ho Ministériu Transporte no Komunikasaun. Iha loron ne’e mós Xefe Misaun Jogu Desportivu CPLP no Komisaun Desportu Konferénsia Ministru Juventude no Desportu (Diretór-Jerál sira) to’o iha Timor-Leste.
Tanba ne’e, sei realiza enkontru iha Ministériu Juventude, Desportu, Arte no Kultura (MJDAK) ba preparasaun reuniaun Komisaun Desportu no Semináriu ba Xefe Misaun.
Iha 26 Janeiru, vizita otél sira husi Xefe Misaun no membru Komisaun Desportu CPLP. Iha mós vizita bá infraestrutura desportiva iha Dili, kampu voleiból, estádiu munisipál Dili, jinájiu munisipál Dili, jinájiu desportu Dili, kampu ténis no kampu desportivu Bekora.
Iha loron 27, sei iha semináriu Xefe Misaun, reuniaun ho MJDAK no halo vizita kortezia ba Primeiru-Ministru, Xanana Gusmão, no kalan konfraternizasaun.
Iha loron 28, Xefe Misaun Jogu CPLP no Komisaun Desportu CPLP fila bá sira-nia rai no iha loron tuirmai mak membru CTA sira.
Notísia relevante: MJDAK-FTTL diskute preparasaun atleta ba jogu CPLP
Jornalista: Jesuína Xavier
Editora: Maria Auxiliadora
