DILI, 07 fevereiru 2025 (TATOLI)–Ministru Juventude, Desportu, Arte no Kultura (MJDAK), Nelyo Isaac Sarmento, hasoru malu ho Federasaun Taekwondo Timor-Leste (FTTL) hodi diskute kona-ba preparasaun atleta sira hodi kompete iha Jogu Komunidade Nasaun Ko’alia Lian Portugés (CPLP, sigla portugés) ne’ebé sei realiza tinan 2025 ne’e iha Timor-Leste.
Nia hatutan, importánsia preparasaun atleta sira hodi reprezenta nasaun ho di’ak ba iha jogu internasionál ne’e no iha enkontru ne’e hodi fó orientasaun no garante kualidade atleta hodi kompete ho másimu iha eventu internasionál ne’e.
“Tinan ida-ne’e mak tinan importante ba desportu nasional. Ami ezije katak atleta sira iha kondisaun fízika no téknika ne’ebé di’ak atu bele kompete ho di’ak iha Jogu CPLP no eventu internasionál seluk,” Nelyo hateten bainhira hala’o enkontru ho Federadaun Taekwondo iha edifisiu MJDAK, Lecidere, ohin.
Iha okaziaun ne’e, Prezidente Federasaun Taekwondo Timor-Leste, Gabriel da Costa, hateten atleta ne’ebé atu kompete iha jogu CPLP ne’e halo ona selesaun iha tinan kotuk.
Nia hatutan, atleta ne’ebé selesiona hamutuk na’in-haat kompostu husi feto rua (2) no mane rua (2), maibé iha atleta ida mak idade liu ona, nune’e federasaun buka meiu hela atu foti atleta seluk substitui.
“Atleta sira-ne’e iha klasifikasaun kategoria 46 kg no 55 kg. Maibé, ida husi atleta sira-nia idade liu tiha ona, tan ne’e ami sei substitui ho atleta ne’ebé iha prestasaun di’ak liuhusi selesaun tinan kotuk,” Gabriel hateten.
Iha parte seluk, Prezidente ne’e informa, atleta Taekwondo sei partisipa iha kompetisaun internasionál ida iha Korea iha fulan-maiu no seluk iha Afeganistaun iha fulan-outubru 2025, atu reforsa preparasaun ba jogu CPLP.
Reuniaun ne’e mós partisipa husi Diretor Jerál Desportu, ekipa téknika husi Federasaun Taekwondo, no ofisiál MJDAK, ne’ebé fó kontribuisaun iha diskusaun kona-ba planu operasionál no estratéjia dezenvolvimentu atleta nian.
Jogu CPLP ba tinan ida-ne’e sei realiza iha fulan jullu hahú 17-27 sei partisipa husi nasaun membru sira hanesan Portugal, Brazil, Guiné Bissau, Guiné Equatoriál, Moçambique, São Tome e Principe, Caboverde, Angola no Timor-Leste rasik.
Totál orsamentu ba jogu CPLP husi preparasaun to’o ramata Governu tau ona orsamentu tinan 2025 nian ho montante millaun $3.7.
Jogu CPLP tinan ida-ne’e sei hetan partisipasaun másimu husi Estadu-membru sira, ho delegasaun hanesan Angola ho partisipante 101, Brazil 101, Cabo Verde 101, Guiné Bissau 61, Guiné Equatoriál 35, Mocambique 70, Portugál 101, São Tomé e Prínsipe 35 no Timor-Leste 101.
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Jornalista : Hortencio Sanchez
Editór : Cancio Ximenes
