BOBONARU, 13 Marsu 2025 (TATOLI)—Ministru Interiór, Francisco da Costa Guterres, hateten daudaun ne’e aloka ka prepara ona orsamentu millaun $14-resin hodi halo konstrusaun foun ba infraestrutura Polisía Nasionál Timor-Leste (PNTL) hamutuk unidade 100-resin ne’ebé identifikadu ona iha munisípiu sira.
Ministru ne’e konfirma infraestrutrura ne’e sei konstrui iha tinan ne’e kompostu husi kuartél Komandu Polísia Munisípiu, kuartél Eskuadra iha postu administrativu ne’ebé ho tipu hanesan Eskuadra Dom Aleixo Dili, Kazerna ho totál uma unidade 12 no bairu Polísia ho totál uma 50 ba superiór no membru sira iha Komandu Munisípiu kompletu ho salaun enkontru.
Ezemplu, nia dehanm iha Munisípiu Bobonaru sei konstrui infraestrutura unidade sia (9) hanesan Kuartél Komandu Munisípiu, Eskuadra Polisiá postu administrativu Bobonaru, Loloto’e, Balibo sei kontrui edifisíu foun kompletu ho Kazerna no bariru Polísia ida iha Maliana.
“Tinan 2025 ne’e, PNTL mak iha projetu barak-liu kedas, 100 liu ba Uma, Kazerna iha munisípiu sira, ita halo hotu. La’ós hotu-hotu kompletu maibé pelumenus balun iha halo kuartél, balun ita halo Kazerna, balun ita halo uma eskuadra, depende ba kondisaun ne’ebé mak imi iha. Maibé, kada munisípiu sei iha ninia konstrusaun iha ne’ebá. Ita-boot sira hatene ba de’it infraestrutrura ne’e ita tau orsamentu liu millaun $14,” Governante ne’e hateten asuntu ne’e durante halo enkontru ho superiór no Membru PNTL Munisípiu Bobonaru, kinta ne’e.
Nia garante, iha fulan rua nia laran ne’e prosesu verifikasaun konklui ona, nune’e bele tama ona ba faze loke konkursu públiku.
Nia hateten, esforsu ne’e Governu halo oinsá atu kria fatin servisu di’ak no kondisaun dignu ba membru PNTL sira liuliu sira-ne’ebé halo traneferénsia husi munisípiu ida ba munisípiu seluk.
“Ida, para ita-boot sira-ne’ebé koloka husi munisípiu ne’e labele buka uma, rai ba fali aluga tun-sae. Uma mak ne’ebá, hela iha ne’ebá hodi ho feen no oan sira ba dala ida. Ha’u mós ko’alia ona ho Ministra Edukasaun para imi kuandu transferénsia ba fatin ruma karik, lori surat ida para bele hatama imi nia-oan eskola iha munisípiu ne’ebé iha fatin servisu ba ne’e,” nia hateten.
Orsamentu tinan ne’e, nia dehan, MI foka mós ba promosaun diviza alende ne’e iha fulan entre Marsu ka Abríl tinan 2025 ne’e, MI mós sei lori rejime salariál foun membru PNTL nian ba diskute iha Konsellu Ministru hodi hetan aprovasaun.
“Ne’e para hadi’a ita-boot sira-nia saláriu. Hadi’a imi-nia morís, ezemplu, sira bele idade ona ne’e reforma karik pelumenús ba vida sivíl ne’e halo netik buat ruma. Se lae, ita-boot sira servisu tinan barak fila ba sivíl morís ladi’ak, kuitadu, ida-ne’e ladi’ak. Ita halo ida-ne’e tanba valoriza imi-nia servisu ne’ebé imi halo tinan barak ona,” nia dehan.
Enkuantu iha orsamentu tinan 2024 ne’e mós Ministériu Insteriór mós konstrui ona infraestrutrura Unidade Patrulamentu Fronteira (UPF) hamutuk unidade-41 iha kompañia Alfa Munisípiu Bobonaru, Carlye Oekuse no Kompañia Bravo iha Kovalima ne’ebé daudaun ne’e ‘On Going’ ka la’o hela.
Notísia Relevante: Konstrusaun kazena no armazein PNTL foin iha faze levantamentu dadus
Jornalista : Sérgio da Cruz
Editór : Cancio Ximenes
