DILI, 01 Agostu 2024 (TATOLI) – Kriasaun kazerna no armazein ba Polísia Nasionál Timor-Leste (PNTL) iha eis-Asrama BRIMOB, Kampung Baru ne’e, foin iha faze levantamentu dadus no seidauk iha desizaun atu hasai família 184, informa Ministru Interiór, Francisco da Costa Guterres.
“Ita-nia ekipa sira bá ne’e foin maka atu halo levantamentu. Bainhira iha ona desizaun ruma maka foin bele halo negosiasaun ho komunidade sira hodi negosia kona-ba presu no sei ko’alia kona-ba sira atu muda fatin”, ministru dehan iha Vila Verde, Dili.
Governante ne’e salienta katak populasaun ne’ebé hela iha eis Brimob ne’e kuaze tinan barak ona no maske PNTL iha planu atu foti fatin ne’e hodi konstrui kazerna no armazein ne’e depoizde levantamentu dadus mak deside atu foti rai metru hira ba konstrusaun uma sira ne’e.
Tanba ne’e, ministru husu ba komunidade ne’ebé hela iha fatin ne’e atu labele rona tun-sa’e, maibé buka koopera ho Governu atu hetan solusaun ruma ba futuru polísia nian. “Lalika laran-taridu, bainhira iha ona desizaun ruma, parte Governu sei mai ko’alia filafali ho komunidade”, dehan.
Iha sorin seluk, portavós komunidade ne’ebé hela iha eis-Asrama BRIMOB, iha aldeia 04 Setembru, suku Comoro, postu administrativu Dom Aleixo, munisípiu Dili, Januário Amaral de Jesus, preokupa no husu ba Ministru Interiór atu halo diálogu ho sira molok halo konstrusaun ba kazerna no armazein.
“Ami komunidade ne’ebé hela iha eis-Asrama BRIMOB ne’e ho totál populasaun hamutuk 1.106 no uma-kain hamutuk 184 ne’ebé hela iha área ne’e, durante tinan 25. Ami koopera ho Governu nia planu no programa ba dezenvolvimentu nasaun nian, maibé ami husu tenke halo diálogu molok mai halo levantamentu dadus ka halo konstrusaun”, Januário de Jesus, hateten iha konferénsia imprensa ne’ebé hala’o iha Kampung Baru, foin lalais ne’e.
Tanba iha 25 Jullu, ekipa neʼebé lideradu husi Asistente Superintendente Polísia, Carlito Adoro, bá halo ona levantamentu dadus sein iha informasaun detalla ba komunidade iha área ne’e.
Husi asaun ne’e populasaun rekoñese MI la konsidera pedidu husi komunidade nian, atu halo diálogu antes hala’o levantamentu dadus. “Ministériu Interiór no Komisáriu Nasionál PNTL la kumpri pedidu ne’ebé komunidade hato’o ona hodi hasoru malu direita ho komunidade”, nia lamenta.
Notísia relevante: Komunidade uma-kain 184 iha Eis-Asrama BRIMOB Comoro husu MI halo diálogu
Jornalista: Tomé Amado
Editora: Maria Auxiliadora
