DILI, 25 Marsu 2025 (TATOLI)-Primeiru Ministru no Ministériu Interior hala’o enkontru kortezia ho Komandante Jerál Guarda Nasionál Republikana (GNR), Portugal, Tenente Jerál Rui Alberto Ribeiro Veloso, iha Palásiu Governu, ohin.
Ministru Interiór, Francisco Guterres, informa katak objetivu husi enkontru ne’e mak aborda kestaun sira oinsá hadi’a di’ak liután servisu Polísia Nasionál Timor-Leste (PNTL) nian; aumenta kapasidade no mentalidade hodi sai seguransa, halo protesaun ba nasaun inklui komunidade sira.
“Enkontru ida-ne’e, komandu jerál atu hato’o intensaun atu kontinua kooperasaun ho Timor-Leste liuliu iha área PNTL para hadi’a kapasidade no servisu ne’ebé ho rigór nune’e ba oin sira bele sai polísia profisionál” Ministru Interior, Francisco da Costa Guterres, ba jornalista sira, hafoin enkontru.
Governu apresia ho oportunidade ida-ne’e no konkorda atu kontinua fó formasaun ba PNTL sira liuliu komandu sira, atu prepara sira hodi sai líder ne’ebé di’ak ba membru sira. Governu mós konkorda ho intensaun ho autoridade seguransa portugés ne’e.
“Tanba ne’e mak Governu Timor-Leste agradese no konkorda, hakarak kontinua kooperasaun ne’e la’o ba oin nafatin no prepara mós ita-nia komandu PNTL sira”, Governante ne’e akresenta.
Iha fatin hanesan, tuir Komandante Jerál GNR, Tenente Rui Alberto Ribeiro Veloso, oportunidade ida ne’e, aleinde vizita Primeiru Ministru no Ministru Interior iha mós intensaun atu halo kooperasaun para apoiu melloria servisu PNTL nian iha Timor-Leste.
“Ha’u iha previléjiu no prazer (ksolok) mai aproveita kumprimenta Primeiru-ministru, Ministru Interiór, inklui mós husi embaixada Portugal. Hakarak dehan katak Guarda Nasionál Repúblikana iha ona Timor iha tinan kotuk no prezente no liliu sempre prontu atu kolabora iha futuru ho Timor-Leste no autoridade Timor-Leste bainhira husu”, Tenente Rui Veloso kompromete.
“Oras ne’e daudaun, ami halo hela daudaun kooperasaun balun iha nível Protesaun Sívil, Polísia (PNTL) no mós hamutuk ho Ministériu Interiór no Embaixada Portugal. Guarda (GNR) sai forsa seguransa nasionál, ho nia prezensa iha Timor ho nune’e hakarak prezensa ne’e nafatin hodi ajuda PNTL hodi hadi’a liután ninia kapasidade tomak iha nível intervensaun polisiál,” nia informa.
Komandu ne’e hatutan tan, iha esperansa mós ba jéneru atu melloria sira nia servisu ho profisionalmente ba sosiedade, no imediatamente ba hirak ne’ebé asegura iha área fronteira. Enkuantu agradese tanba kooperasaun ne’e la’o ho di’ak, nune’e bele kontinua servisu mós iha futuru mai.
Jornalista: Alexandra da Costa
Editór: Rafael de Ximenes de A. Belo
