DILI, 17 Abríl 2026 (TATOLI)—Komandu Polísia Nasionál Timor-Leste (PNTL) Munisípiu Dili halo ona identifikasaun ba suspeitu na’in-lima ho inisiál RS, AJM, WSS, ERS no JDT, ne’ebé baku lezadu Izaquel iha Universidade da Pás (UNPAZ) iha Kuarta (15/04), ne’ebé vídio ne’e publika iha Facebook no ema ema hotu akompaña.
Hafoin akontesimentu ne’e, vítima hato’o keixa ba Polísia Sientífika Investigasaun Kriminál (PCIC, sigla portugés) no Polísia Eskuadra Dom Aleixo.
Vítima husi kazu ne’e iha na’in-tolu hanesan Izaquel, Jito Soares no Manelito, maibé Izaquel mak suspeitu sira baku.
Nune’e, iha loron Kinta (16/04) patrolu Eskuadra Dom Aleixo bá kedan iha areadór UNPAZ hodi koordena ho parte seguransa no Ofisiál Polísia Suku (OPS) Manleuana hodi buka tuir suspeitu sira ne’ebé iha momentu ne’ebá halai sees husi fatin akontesimentu.
“Ita lokaliza suspeitu sira, patrollu sira bá kedan iha sira-nia rezisténsia hodi ita halo kapturasaun ba suspeitu na’in-lima. Ita lori mai Eskuadra Dom Aleixo hodi halo identifikasaun,” Komandante PNTL Munisípiu Dili, Komisáriu Asistente Polísia Orlando Gomes, informa ba Jornalista sira iha ninia knaar fatin, Eskudra Dom Aleixo, Komoro, Sesta ne’e.
Notísia relevante : Suspeitu VC baku nia kaben membru Polísia iha Kuartél Jerál
Hafoin halo tiha identifikasaun ba suspeitu sira, Komandu PNTL Munisípiu Dili entrega suspeitu sira ba PCIC tanba molok ne’e lezadu hato’o uluk ona keixa hodi kontinua prosesu.
Komisáriu Asistente Polísia Orlando Gomes konsidera aktu sira ne’ebé suspeitu sira halo hasoru lezadu ne’e krime, hanesan agresaun fíziku simples hasoru lezadu.
Komandante ne’e dehan, UNPAZ ne’e fatin ne’ebé mak ema hotu atu ba estuda. Maibé dalaruma estudante sira ka ema balun husi li’ur sempre ba fatin ne’ebá lori problema.
“Tanba ne’e, husi Komandu Munisipiu Dili hakarak apela ba estudante sira ka ema seluk atu nune’e problema sira ne’ebé partikulár iha li’ur labele lori to’o universidade ka eskola tanba fatin sira ne’e fatin ne’ebé estudante sira aprende hodi bele sai matenek, la’ós fatin lori fali problema no halo krime iha ne’ebá,” nia katak.
Tanba ne’e, husu ba estudante joven sira ne’ebé mak la’ós eskola iha ne’ebá, atu respeita fatin apredizajen atu nune’e labele perturba ka halo fali krime.
“Tanba fatin ne’ebá (UNPAZ) akontese ona kazu barak barak tanba patrollu dalabarak halo intervensaun beibeik. Husu ba ita hotu atu respeita fatin ne’e, fatin ida ita ba aprende no buka matenek la’ós ita ba implementa fali hahalok krime,” nia tenik.
PNTL seidauk hatene motivu husi akontesimentu ne’e tanba sei iha prosesu, maibé tanba problema partikular iha li’ur liga mós ba iha estudante (lezadu) ne’e, entaun bainhira nia ba eskola no atu sai fotokopia dokumentu eskola, to’o iha portaun iha suspeitu AJM husu ba lezadu katak “o mete ka” husi liafuan ida-ne’e sira duni tuir lezadu ne’e hodi sira baku lesuk nia.
Husi problema ne’e lezadu sofre kanek husi tilun no ibun ran inklui liman sikun mós hetan kanek.
Jornalista : Natalino Costa
Editora : Julia Chatarina
