DILI,10 Abríl 2026 (TATOLI)–Suspeitu VC baku nia kaben ho inisiál ODS, ne’ebé nu’udar membru Polísia Nasionál Timor-Leste (PNTL) destakadu iha Komandu Jerál, Kaikoli.
Suspeitu halo nia asaun iha Kinta (09/04) maizumenus tuku 11:00 dadeer, bainhira ODS mai iha serbisu fatin no halo hela serbisu, nune’e nia laen bá rasta hodi baku to’o vítima monu.
Bainhira suspeitu halo tiha asaun, Departamentu Investigasaun Kriminál halo kedan atuasaun hodi lori vítima ba Vuneralvel Person Unit (VPU) hodi asegura.
Kazu ne’e PNTL rejista ona ho NUC 0128/26-PNSIK. PNTL konsidera kazu ne’e nu’udar krime maus tratu ka violénsia ne’ebé previstu no punidu iha artigu 154, 155 no 156 husi Kódigu Penál Timor-Leste no konjuta mós ho krime violénsia doméstika husi lei númeru 7/2010 Kontra Violénsia Doméstika.
Notísia relevante : Opozisaun lamenta ho violénsia hasoru feto no husu reforsa medida preventiva
Diretór Nasionál Servisu Investigasaun Kriminál, Superintendente Xefe Polísia João Belo, hateten, iha kazu ofensa integridade fízika ne’ebé mak sidadaun ida baku nia fe’en nu’udar membru Polísia.
“Ofensa integridade simples ita bele halo iha ne’ebé, maibé kuandu iha kuartel Jerál ne’e ita konsidera la’ós problema atu abuza malu ka la’ós rezolve problema família,” João Belo hato’o ba Jornalista sira iha ninia knaar fatin, Kaikoli, Sesta ne’e.
Nia dehan, bainhira membru ruma iha problema família tenke rezolve iha uma.
“Buat ruma ladi’ak, tenke ko’alia ba malu. Ho nune’e kazu ne’e ita submete ona ba Ministériu Públiku,” nia katak.
Jornalista : Natalino Costa
Editora : Julia Chatarina
