DILI, 23 Marsu 2026 (TATOLI)-Bankada Frente Revolusionária Timor-Leste Independente (FRETILIN) lamenta ho aktu violénsia hasoru feto ne’ebé kontinua akontese iha sosiedade, nune’e ezije ba Ezekutivu no parte relevante sira atu reforsa medida preventiva.
Deputada FRETILIN, Nurima Ribeiro Alkatiri, hateten iha Marsu nia laran, fulan ne’ebé inklui loron internasionál ne’ebé dedika ba promosaun direitu feto nian no igualdade jéneru, maibé feto Timór kontinuan hasoru dezafiu.
“Ita labele foku de’it ba inisiativa formál sira no diskursu institusionál sira, tanba realidade loroloron feto timoroan barak kontinua hasoru dezafiu ne’ebé boot. Foin lalais sai iha mídia kona-ba violénsia doméstika ida tan, ne’ebé grave tebes no rezulta maluk feto ida hetan oho husi nia parseiru rasik”, nia hato’o liuhusi deklarasaun polítika iha reuniaun plenária Parlamentu Nasionál, ohin.
Tuir nia, ida-ne’e kazu ida entre kazu barak ne’ebé akontese no la’ós problema izoladu ida, maibé fenómenu estruturál ne’ebé ezije resposta ne’ebé konsistente no sustentavel. Hanesan mós relatu sira ne’ebé aumenta kona-ba asédiu no abuzu seksual, inklui iha dalan, eskola no fatin serbisu, hatudu katak sei iha prosesu naruk atu la’o hodi garante katak feto no ema hothotu bele moris ho seguransa no dignidade.
“Realidade ida-ne’e, nu’udar kestionamentu direitu ita nu’udar desizór polítiku sira. Aleinde rekoñese problema ne’ebe eziste, ita presiza hametin efikásia polítika públika sira ne’ebé iha ona, investe iha edukasaun ba igualdade no dezenvolve mekanizmu prevensaun ne’ebé promove kultura respeitu mútuu”, dehan.
Deputada ne’e subliña katak konstrusaun sosiedade ida ne’ebé justa liu no inkluziva ezije kompromisu husi ema hotu – Estadu, instituisaun no mós sidadaun sira.
Lembra katak, iha sábadu foin lalais, Polísia Nasionál Timor-Leste (PNTL), liuhusi Komandu Munisípiu Dili detein suspeitu ida ho insiál CdA, ne’ebé alegadamente envolve iha krime omisídiu agravadu, tanba oho nia feen kaben Verónica dos Santos, iha Praia dos Coqueiros, uluk loja Seara nia oin.
Motivu loloos husi kazu ne’e iha hela prosesu investigasaun kle’an, enkuantu PNTL kaptura ona suspeitu no lori bá detein iha Komandu Munisípiu Dili hodi submete ba iha prosesu investigasaun hodi kontinua ba iha Ministériu Públiku.
Notísia relevante: PNTL detein suspeitu oho nia feen iha Praia dos Coqueiros
Jornalista: Nelson de Sousa
Editora: Maria Auxiliadora
