DILI, 21 Marsu 2026 (TATOLI) – Polísia Nasionál Timor-Leste (PNTL), liuhusi Komandu Munisípiu Dili detein suspeitu ida ho insiál CdA, ne’ebé alegadamente envolve iha krime omisídiu agravadu, tanba oho nia feen kaben Verónica dos Santos, iha tuku 03h50 madrugada sábadu ne’e, iha Praia dos Coqueiros, uluk loja Seara nia oin.
Komandante Munisípiu Dili, Komisáriu Asistente Polísia Orlando Gomes, haktuir katak bainhira patrulla to’o fatin iha lokál krime, hetan mate-isin feto ida. Nune’e, ekipa patrulla kontaktu kedas parte Forensik PNTL hodi foti mate-isin no transporta bá Ospitál Nasionál Guido Valadares (HNGV, sigla portugés).
“Patrullamentu to’o kedas iha fatin hodi asegura lokál krime no ita kontaktu ba iha Forensik atu mai foti mate-isin lori bá iha mortuáriu Ospitál Nasionál Guido Valadares no suspeitu ita kaptura kedas, lori bá detein iha ita-nia Komandu Munisípiu Dili para submete ba iha prosesu investigasaun hodi kontinua ba iha Ministériu Públiku”, Orlando Gomes hateten ba jornalista sira iha Sentru Formasaun Polísia (CFP-sigla Portuges), Komoro, ohin.
Nia dehan katak motivu loloos husi kazu ne’e sei iha hela prosesu investigasaun kle’an. “Espera iha kazu violénsia doméstika depois mak bele hamosu la’en oho nia feen. Iha prosesu investigasaun mak ita bele hatene motivu husi kazu ne’e rasik”, nia hateten.
Orlando salienta katak mate-isin agora iha sala mortuáriu HNGV, no parte Forensik PNTL kontinua halo akompañamentu.
Relasiona ho kazu ne’e, vítima nia inan, Luisa Francisca da Silva, relata nia ona feto ho nia la’en hola-malu seidauk to’o tinan, maibé sira hasoru hela problema loron-kalan.
Tuir nia, problema mosu tanba suspeitu ne’e dezempregadu. Vítima husu ba nia la’en atu buka serbisu hodi sustenta família, tanba durante inan mak apoia sira na’in-rua.
Luisa mós hateten katak suspeitu la konxiente no iha loron hirak liubá tanba hemu tua hamutuk ho nia kolega sira iha Praia dos Coqueiros no bainhira fila bá uma atu sona nia feen.
Nia konta katak iha momentu ne’ebá vítima sofre trauma no família informa kedas ba Batallaun Orden Públika ne’ebé halo seguransa iha Rotunda Nicolau Lobato, Komoro. Iha kazu ne’e, polísia haruka sira bá rezolve iha Polísia Kaikoli no problema hotu ona.
Maibé iha sesta kalan ne’e, vítima husu ba nia inan dehan sai bá hadeer ai-funan iha Praia dos Coqueiros, no de repente matebian bá fali hemu tua hamutuk ho nia kolega sira iha Jardín Motaél nian.
Tuir informasaun família, suspeitu hetan vítima no lori nia mai oho iha kontentór ida iha loja Seara uluk nia kotuk no lori mai soe iha loja ne’e nia oin. Komunidade iha área ne’e hetan nia mate-isin no informa ba polísia.
Servisu informasaun polísia kaer ona suspeitu no entrega iha PNTL Kaikoli atu prosesa tuir lei.
Jornalista: Natalino Costa
Editora: Maria Auxiliadora
