DILI, 14 Abríl 2025 (TATOLI) – Autoridade Portuária Timor-Leste (APORTIL) sei halo, iha tinan ne’e, manutensaun ba ró Berlin Ramelau.
Vogál II APORTIL, Leandro de Sena, hateten kada tinan APORTIL sempre prevee orsamentu rihun $800 ba manutensaun ró Berlin Nakroma no Berlin Ramelau, ne’ebé aloka ba kada rihun $400.
“Maibé depende ba kondisaun ró nian. Daudaun tékniku sira identifika hela ka dock list ba ró ne’e hotu, konsellu aprova hodi lori bá manutensaun. Manutensaun nafatin halo iha Surabaya. Ita planu meadu tinan ne’e, tenta fulan Juñu ka Jullu tenke halo ona, nune’e fim do ano ró tenke iha ne’e ona, tanba to’o fim do ano ne’e atividade barak ona”, Leandro de Sena dehan ba TATOLI iha APORTIL.
Nia esplika katak manutensaun ró Berlin Nakroma no Ramelau ne’e nu’udar manutensaun rotina, tanba tuir kritéria, kada ró iha tempu ba manutensaun iha períodu ne’ebé tenke halo, inklui reativa nia dokumentu.
Nia adianta katak manutensaun ba ró Berlin Ramelau tinan ne’e, aleinde haree ba kondisaun ró nian sei aumenta ekipamentu balun ba Berlin Ramelau hanesan monta tan ár kondisionadu (AC) hodi fasilita pasajeiru sira halo viajen.
Lembra katak, antes ne’e, APORTIL halo uluk ona manutensaun ba ró Berlin Nakroma iha Outubru 2024 no fila hikas mai Dili iha Marsu 2025.
Notísia relevante : https://tatoli.tl/2025/03/11/berlin-nakroma-too-hikas-dili-hafoin-manutensaun-iha-surabaya/
Jornalista: Arminda Fonseca
Editora: Maria Auxiliadora
