DILI, 11 Marsu 2025 (TATOLI)–Ró-ahi Berlin Nakroma fila hikas mai Dili, iha tersa ne’e, hafoin ramata manutensaun iha Surabaya, Indónezia.
Manutensaun ba ró-ahi ne’e rasik Autoridade Portuária Timor-Leste, Institutu Públiku (APORTIL, I.P) orsamenta ho montante rihun $786.
Berlin Nakroma bá halo manuntesaun iha Outubru 2024, maibé antes arraka bá, APORTIL kontrata, iha Setembru, tékniku husi PT. Dewa Ruci Agung mai iha Timor-Leste hodi sobu mákina ró nian no hadi’ak molok bá halo manutensaun, tanba ró nia kondisaun ladi’ak.
“Ohin ró to’o ona, aban loke mak halo inspesaun no sesta agora ami ho komitiva Primeiru-Ministru, Xanana Gusmão, sei halo trial ró bá Ataúru”, Prezidente APORTIL, I.P, José de Oliveira Leong, informa iha Portu Dili, ohin.
Nia esplika katak manutensaun ne’ebé empreza halo ne’e hahú husi nia mákina laran to’o mai iha li’ur, inklui foin lalais ró hetan asidente ne’e, empreza rasik mak responsabiliza no Governu la aumenta adisionál ruma, tanba tuir kontratu, ró iha ona sira-nia liman mak akontese buat ruma sira mak responsabiliza.
Notísia relevante: Berlin Nakroma hetan asidente iha Surabaya
Iha fatin hanesan, Kapitaun Jerál Portu Dili, Rogério Soares, dehan ekipa ne’ebé sei halo inspesaun ba ró ne’e mai husi Diresaun Nasionál Transporte Marítima (DNTM), imigrasaun, kuarentena no saúde, ne’ebé sei hala’o idaidak ninia serbisu.
“Inspesaun ne’ebé ita atu halo ne’e haree ba dokumentu ró nian [hahú husi] bá to’o filafali mai. Ró ohin fila ne’e tékniku no tripulante ne’ebé iha laran hamutuk 16”, adianta.
Iha sorin seluk, deputada husi bankada opozisaun Partidu Libertasaun Nasionál (PLP), Maria Angelina Sarmento, lamenta ho manutensaun ró Berlin Nakroma ne’ebé lori tempu kle’ur.
“Hakarak levanta manutensaun ró Berlin Nakroma ne’ebé efetua [durante] fulan-haat ka lima ona iha Indonézia, maibé to’o agora seidauk konklui. Normalmente, manutesaun lori tempu semana tolu ka haat”, deputada hato’o liuhusi reuniaun plenária Parlamentu Nasionál, ohin.
Notísia relevante: Bankada Opozisaun preokupa manutesaun Ró Berlin Nakroma la’o kleur
Jornalista: Arminda Fonseca
Editora: Maria Auxiliadora
