DILI, 31 Janeiru 2025 (TATOLI) – Ministru Transporte no Komunikasaun, Miguel Manetelu Marques, hateten ró Berlin Nakroma hetan asidente iha Surabaya, Indonézia.
“Ha’u hakarak klarifika katak ohin dadersán ha’u foin hetan informasaun, iha duni asidente. Ho ida-ne’e mak ha’u mai Autoridade Portuária Timor-Leste [APORTIL] atu konfirma katak ró hetan asidente la’ós xoke, maibé kose”, Miguel Manetelu hateten, ohin.
Iha fatin hanesan, Prezidente APORTIL, José de Oliveira Leong, relata katak ró Berlin Nakroma hetan asidente iha kinta madruga foin lalais ne’e, iha portu Tanjung Perak, Surabaya, maibé la grave tanba ró ne’e hetan kose de’it.
Nia esplika katak ró ne’e hetan asidente, tanba nia angkor ne’e ladún boot hanesan pezu ró boot sira, nune’e laloran boot muda nia maka kose fali ba ró boot ida ne’ebé para iha portu.
“Ami iha dadus kompletu. Atu hateten de’it ba públiku katak ró ne’ebé hetan asidente ne’e laiha tan adisionál ona, tanba tuir akordu ne’ebé ita halo ho kompañia PT. Dewa Ruci Agung, katak bainhira sira halo manutensaun ró tantu iha rai-maran no tasi-laran mak akontese buat ruma sira mak responsabiliza, ne’ebé daudaun sira sei hadi’a”, José Leong dehan.
Prezidente ne’e realsa katak kona-ba prosesu manutensaun ba ró nian hotu ona no daudaun hein de’it sertifikasaun husi Biro Klasifikasi Indonesia. “Bainhira sira fó ona sertifikasaun, ró sei mai fali”, nia dehan.
Lembra katak Berlin Nakroman bá halo manutensaun iha fulan-Outubru ho durasaun tempu fulan rua iha Surabaya. APORTIL prevee rihun $786 ba manutensaun ró ne’e.
Notisia relevante: Reparasaun Ró-ahi Berlin Nakroma atinje 59%
Jornalista: Arminda Fonseca
Editora: Maria Auxiliadora
