DILI, 11 Marsu 2025 (TATOLI)–Deputada Bankada Opozisaun husi Partidu Libertasaun Nasionál (PLP), Maria Angelina Sarmento, preokupa ho manutensaun ró Berlin Nakroma ne’ebé lori tempu kleur ona seidauk finaliza.
“Hakarak levanta manutensaun Ró Berlin Nakroma ne’ebé efetua fulan-haat ka lima ona iha Indonézia maibé to’o agora seidauk konklui, enkuantu normalmente manutesaun lori tempu semana tolu ka haat,” Deputada hato’o liuhusi reuniaun plenária Parlamentu Nasionál (PN), tersa ne’e.
Nia haktuir, manutensaun ne’e efetua gasta rihun $785, enkuantu iha governasaun anteriór bainhira halo manutensaun gasta rihun $200-resin. Tripulante ró ne’e iha ema na’in-ualu nu’udar timoroan.
“Maibé iha IX Governu la kontinua kontratu maibé kontrata fali tripulante ema Indonézia de’it. Enkuantu timoroan ne’ebé iha kapasidade iha área ne’e ita abandona, loloos fó inspirasaun ba timoroan sira ne’e serbisu kompete iha área ne’e, difikuldade ne’ebé sira levanta ita seidauk iha lei atu fó oportunidade ba tripulante sira ne’e iha sertifikadu online, sentidu ne’e ita adere ona ba Organizasaun Mundiál Komérsiu (OMK) no futuru ba ASEAN, ita labele kompete, ema estranjeiru mak mai sei prienxe hotu,” nia preokupa.
Notísia relevante : Berlin Nakroma hetan asidente iha Surabaya
Reprezentante Governu liuhusi Vise-Ministru ba asuntu Parlamentár, Adérito Hugo da Costa, rejista preokupasaun ne’e.
“Kona-ba kestaun operasionalizasaun no manutensaun ba Ró Berlin Nakroma, ami rejista preokupasaun no informasaun envia direta ba Ministru Transporte Komunikasaun hodi bele fó resposta detallu,” nia akresenta.
Jornalista : Nelson de Sousa
Editora : Julia Chatarina
