BAUKAU, 22 Abríl 2025 (TATOLI)-Sarani Parókia Santu António Vila antiga Baukau realiza misa requem no velada (reza hamutuk) ba falesimentu Papa Francisco durante loron-haat.
Padre Paróku Santu António, Manuel da Silva Ximenes,SDB, esplika parókia deside sei hala’o velada no misa requim durante loron-haat, ne’ebé sei partisipa husi sarani iha kada sentru, nune’e liuhosi orasaun bele haraik lalehan ba Papa Francisco ne’ebé husik ona mundu iha loron segunda, 21 Abríl.
“Ida-ne’e hatudu sentidu kondolénsia, ita halo ida-ne’e nu’udar sarani, tanba Papa ita-nia lideransa kreda nian, ne’e hanesan momentu lutu laran”, Padre Parókia Santo António Vila antiga Baukau ba TATOLI iha Igreja Pro Katedrál Dioseze Baukau, tersa ne’e.
Padre Manuel Ximenes konsidera Papa Francisco nu’udar pesoál ne’ebé iha paixaun no fieldade ba kreda nu’udar Vigáriu Kristu nian iha mundu no pesóal ne’ebé luta ba pluralismu.
Alende ne’e, Papa Francisco durante lidera Igreja Katólika la-halo diskriminasaun ba relijiaun seluk, toleránsia ba ema hotu ne’e hatudu liuhusi dokumentu Papa Francisco nian kona-ba fraternidade umana no hakribi diskriminasaun.
“Ita lakon matenek no Santu boot-ida”, Padre Manuel Ximenes akresenta.
Padre Manuel Ximenes agradese ba sarani Katólika iha Timor ne’ebé espresa sentimentu lakon ne’e liuhosi reza no sunu lilin iha altar Santu Tasi-tolu no iha kada parókia tanba ho prezensa Papa durante halo vizita iha Timor-Leste husik hela domin ba timoroan hotu.
Parókia Santu António Vila antiga kontinua konvida sarani sira iha kada sentru, grupu apostóliku, relijioza, madre sira inklui joven sira atu partisipa iha atividade reza hamutuk no misa iha Igreja Pro Katedrál nu’udar espresaun domin ba Papa Francisco.
Entertantu, tuir oráriu ne’ebé parókia Santu António Vila antiga fó-sai, atividade misa sei hahú ohin husi oras 18:00 to’o 21:00 kalan durante loron-haat ne’ebé sei hola parte husi sarani kada sentru no zona pastorál antes misa jerál Dioseze Baukau nian iha loron Sábadu 26 Abríl.
Notísia relevante: Serimónia fúnebre Papa Francisco realiza iha loron 26 Abríl
Jornalista : Natalino Belo
Editóra : Rita Almeida
