DILI, 22 Abríl 2025 (TAOLI) – Serimónia fúnebre Papa Francisco, líder Igreja Katólika, sei realiza iha sábadu dadeer, loron 26 fulan-Abríl, iha tuku 10h00 oras Roma (Timor-Leste loraik tuku 17h00), informa Vatikanu.
Serimónia fúnebre Santu Padre nian sei hala’o iha Bazílika Saun Pedro nia oin.
Kaixaun Santu Padre nian depois sei lori bá iha igreja laran no husi ne’ebá sei transfere bá Bazílika Santa Maria Maggiore atu haloot.
Santa Sé fó sai mós katak Dekanu Koléjiu Kardeonalísiu, Giovanni Battista Re, mak sei prezide misa fúnebre ne’e.
Iha loron 23, iha kuarta dadeer, Papa nia mate-isin sei translada bá Bazílika Saun Pedro nian, nune’e sarani sira bele presta omenajen.
Kardeál Kevin Farrell, Camerlengo Santa Igreja Romana, mak sei prezide ritu transladasaun ne’e ho momentu orasaun ida.
Prosisaun sei liuhusi Prasa Santa Marta, Prasa Mártir Romanu, Arku Sinu no depois sei tama iha Bazílika Vatikanu husi odamatan sentrál.
Tuirmai, iha Altar Konfisaun, Kardeál Camerlengo sei dirije Liturjia da Palavra, no iha finál sei hahú ho vizita sarani sira ba mate-isin Pontífise nian.
Papa Francisco hakotu iis ho idade 88, iha loron 21 Abríl, iha tuku 07h35 oras lokál, tanba sofre derrame serebrál, koma no kardiorrespiratória mak para.
Papa Francisco sei hakoi iha Bazílika Santa Maria Maggiore, espesifikamente iha Kapela Paulina ne’ebé rai íkone antigu Maria Salus Populi Romani. Desizaun ne’e foti bazeia ba legadu espirituál ne’ebé hakerek husi Papa rasik iha loron 29 Juñu 2022.
Haktuir husi Vatikanu, iha ninia legadu ne’e Santu Padre hahú hodi entrega nia moris no mate ba Santísima Trindade no espresa dezeju atu ninia mate-isin deskansa iha fatin santu ne’ebé uluk sai sentru ninia devosaun ba Maria Santísima.
Nia hakerek: “Ha’u husu atu ha’u-nia mate-isin deskansa no hein loron Resurreisaun nian iha Bazílika Papál Santa Maria Maggiore nian, iha ne’ebé ha’u sempre reza iha inísiu no rohan viajen apostólika nian”.
Papa nia rate sei tau simplesmente, iha fatin hakoi nian entre Kapela Paulina no Kapela Sforza, la utiliza ornamentu espesiál ruma no lori de’it inskrisaun: Franciscus.
Notísia relevante: Papa Francisco sei haloot iha Bazílika Santa Maria Maggiore tuir nia legadu espirituál
TATOLI
