DILI, 22 Abríl 2025 (TATOLI) – Papa Francisco sei hakoi iha Bazílika Santa Maria Maggiore, espesifikamente iha Kapela Paulina ne’ebé rai íkone antigu Maria Salus Populi Romani. Desizaun ne’e foti bazeia ba legadu espirituál ne’ebé hakerek husi Papa rasik iha loron 29 Juñu 2022.
Haktuir husi Vatikanu, iha ninia legadu ne’e Santu Padre hahú hodi entrega nia moris no mate ba Santísima Trindade no espresa dezeju atu ninia mate-isin deskansa iha fatin santu ne’ebé uluk sai sentru ninia devosaun ba Maria Santísima.
Nia hakerek: “Ha’u husu atu ha’u-nia mate-isin deskansa no hein loron Resurreisaun nian iha Bazílika Papál Santa Maria Maggiore nian, iha ne’ebé ha’u sempre reza iha inísiu no rohan viajen apostólika nian”.
Papa nia rate sei tau simplesmente, iha fatin hakoi nian entre Kapela Paulina no Kapela Sforza, la utiliza ornamentu espesiál ruma no lori de’it inskrisaun: Franciscus.
Kustu funeráriu sira sei la foti husi kofre Igreja nian, maibé sei selu husi doadór ida, hanesan Papa arranja ona antes liuhusi Kardeál Rolandas Makrickas, Komisáriu Estraordináriu Bazílika Santa Maria Maggiore nian.
Legadu ne’e remata ho orasaun no oferta domin nian husi bibi-atan ida ne’ebé nia moris dedika ba servisu no dame: “Sofrimentu ne’ebé marka ona parte ikus ha’u-nia moris nian, ha’u oferese ba Maromak, ba dame iha mundu no ba maun-alin entre povu sira”.
Sarani Katóliku sira iha mundu tomak oras ne’e prepara hela atu akompaña Papa nia viajen ikus (funebre) ho orasaun no misa espesiál sira, inklui iha Timor Leste, ne’ebé iha ligasaun emosionál maka’as ho Papa Francisco dezde nia vizita istórika iha tinan kotuk.
Kardeál Farrell sei prezide ritu fúnebre ba Papa Francisco nia mate
Kardeál Kevin Farrell, Camerlengo husi Santa Igreja Romana, sei prezide ritu fúnebre husi Papa Francisco nia mate no kolokasaun husi nia mate-isin iha kaixaun iha loron-segunda kalan.
Gabinete Imprensa Santa Sé nian fó sai iha loron-segunda katak rituál funebre mate no kolokasaun husi matebian Papa Francisco nia mate-isin iha kaixaun hala’o iha loron segunda tuku 8h00 kalan oras Roma nian.
Kardeál Kevin Farrell, Camerlengo husi Igreja Santa Romana, sei prezide rituál iha Kapela husi Vatikanu nia Casa Santa Marta.
Iha anúnsiu ne’e, Gabinete Imprensa indika katak sira ne’ebé marka prezensa sei inklui Dekanu Koléjiu Kardeál sira-nian, Kardeál Giovanni Battista Re, no membru família sira husi Saudozu Papa Francisco, hamutuk ho Andrea Arcangeli no Luigi Carbone, Diretór no Adjuntu Diretór Diresaun Saúde no Ijiene nian, respetivamente.
Diretór Gabinete Imprensa Santa Sé nian, Matteo Bruni, hatete ba jornalista sira katak Papa nia mate-isin bele transfere bá Bazílika Saun Pedro nian iha loron-kuarta dadeer, hodi nune’e sarani sira bele reza.
“Transladasaun ba Santu Padre nia mate-isin bá Bazílika Vatikanu, ba sarani sira hotu nia venerasaun, bele akontese iha loron-kuarta dadeer, 23 Abríl 2025, tuir arranju sira ne’ebé sei determina no komunika aban, tuir Kongregasaun Kardeál sira-nian dahuluk”, dehan Matteo Bruni.
Iha fatin ketak, Gabinete Imprensa fó sai katak, misa kanonizasaun ba Beatu Carlo Acutis suspende temporariamente tanba Amu Papa Francisco mate.
Selebrasaun eukarístika no ritu kanonizasaun nian marka ona ba domingu, 27 Abríl, iha domingu daruak Páskua nian, ne’ebé selebra mós nu’udar Domingu Mizerikórdia Divina.
Notísia relevante: Governu dekreta Lutu Nasionál durante loron hitu ba falesimentu Papa Francisco
Jornalista: Cidalia Fátima
Editora: Maria Auxiliadora
