KOVALIMA, 30 Abríl 2025 (TATOLI) – Diretór Servisu Munisipál Água, Saneamentu no Ambiente, Angelino Henrique, informa katak karreta baskolante rua de’it nune’e la sufisiente rekolla lixu atu kobre hotu, iha kapitál munisípiu Kovalima.
“Ita loro-loron rekolla lixu iha kapitál munisípiu Kovalima ho nune’e ita sei menus transporte tanba kareta truck rua de’it la sufisente atu rekolla lixu iha fatin hotu. Ita mós halo monitorizasaun fatin sira ne’ebé la merese komunidade sira atu soe lixu”, Angelino Henrique dehan ba TATOLI, AMC, ohin.
Dirijente munisípiu ne’e dehan, ho nune’e SMASA iha planu atu hala’o atividade sosializasaun ba fatin ne’ebé la merese komunidade sira atu soe lixu mak hanesan iha auto-estrada; hahú parte suku Ogues nian ba to’o iha eskola sekundáriu jerál Públiku Suai no parte tasi-ibun.
“Iha parte tasi-ibun, ita elabora ona iha Planu asaun anuál (PAA) atu halo limpeza tanba iha tinan kotuk ita halo limpeza nune’e ita mós orienta ona ba komunidade sira presiza kria fatin lisu nune’e karreta sira ba rekolla de’it”, nia informa.
Ho nune’e nia dehan, kona-ba halo limpeza esgotu, daudaun ne’e, loro-loron la’o hela, maibé menus pesoál hamoos esgotu; hamutuk na’in-19 de’it, nune’e labele kobre hotu hamoos esgotu iha kapitál munisípiu Kovalima.
“Ijiéne Kovalima iha ita hotu nia liman”
Ho menus rekursu umanu hanesan dirijente mós sei halo ajustamentu atu sosa karreta tolu nune’e autoridade rasik mak rekolla lixu tanba daudaun ne’e autoridade kontratu hela ho empreza Crazy Horse mak rekolla lixu iha kapitál munisípiu Kovalima.
“Ha’u hanoin bainhira iha fatin balun ne’ebé mak karreta la konsege rekolla lixu, presiza kontaktu parte saneamentu para ita bele rekolla lixu sira ne’e no labele nonok tanba ijiéne iha Kovalima iha ita hotu nia liman. Ba empreza sira ne’ebé mak prodús lixu bele so’e direta iha Haemanu”, nia dehan.
Iha esbosu proposta Orsamentu Jerál Estadu 2026 ne’e, Servisu Munisipál Água no Saneamentu no Ambiénte (SMASA) aloka orsamentu hamutuk $242,168.00 ne’ebé fahe ba kategória saláriu no vensimentu $ 140.768.00, bens servisu $ 171,700.00 no kapitál menór $ 111,700.00.
Jornalista:Celestina Teles
Editór: Rafael Ximenes de A. Belo
