DILI, 14 Maiu 2025 (TATOLI) – Ministériu Administrasaun Estatál liuhusi Diresaun Nasionál Kooperativa ne’ebé sai hanesan Komisaun organizadora (KO) kontinua halo preparasaun ba atividade espozisaun nasionál ne’ebé realiza hahú kinta ne’e.
Tuir Sekretáriu jerál KO MAE, Angelo Urbano Fernandes, preparasaun ba atividade ba Aban nian iha ámbito 20 de Maiu 2025 ne’ebe ita komemorasaun ba tinan-23.
“Ita mós halo espozisaun. Ita envolve munisípiu hotu-hotu nune’e daudaun ne’e ekipa lojístika sira no komisaun organizadora kada munisípiu ida-idak konsentra iha Portu Dili instala hela tenda ba espozisaun nian”, Sekretáriu ne’e informa ba jornalista TATOLI iha edifísiu MAE, Kaikoli, Dili, ohin.
Aleinde ne’e sira sei arruma didi’ak tenda sira tanba atividade ne’e sei loke abertura diretamente husi Prezidente Repúblika tuir konvite sei abertura iha tuku-neen lorokraik.
“Ita bele dehan preparasaun ne’e ita tenke finaliza kedas iha kalan ne’e no loron kontinua to’o meudia tanba lorokraik ita hahú abertura,” nia garante.
Angelo Urbano Fernandes informa katak atividade ne’e la konvida sira liña ministeriál no ajénsia ruma atu prienxe iha espozisaun, maibé iha parseiru hanesan Ministériu Komérsiu no Indústria (MCI) mak partisipa tanba sira sei halo espozisaun mós kona-ba artezanatu no kulinária sira.
“Kona-ba oras, aban sei taka iha 12:00 kalan no loron tuirmai sei loke husi tuku 7:00 dadeer to’o tuku 12:00 kalan, maibé iha loron 20 sei taka seremónia iha oras tuku 01:00 madrugada, sei anima mós husi grupu banda sira”, nia aumenta.
Atividade ne’e sei loke ba públiku katak asesu ho gratuita no totál orsamentu gastu ba atividade ne’e hamutuk $83 mil doláres amerikanu.
Entretantu, kada KO ne’ebé kada munisípiu destaka iha Portu Dili mós halo hela preparasaun hanesan balun komesa konstrui ona sira-nia reprezentante identidade kultura nian.
Nune’e tuir KO munisípiu Ainaru, Agostinho Doutel Sarmento hatete, sira mai ho ekipa kiik-oan ida hodi halo preparasaun hanesan halo uma-lisan hodi reprezentante identidade munisípiu Ainaru.
“Husi um- lisan ne’ebé ami kontrui ne’e hodi tau iha espozisaun nune’e bele hatudu ba ema hotu katak Ainaru mak ne’e no la’ós de’it hatudu ho ninia letra maibé ho ninia identidade,” Agostinho Doutel Sarmento hatete.Sarmento hatutan, ekipamentu hodi konstrui ba uma-lisan ne’e sira lori husi munisipíu Ainaru rasik hanesan du’ut, au, tali no ai.
“Sasan sira ami lori mai ne’e kompostu husi postu tolu iha Ainaru; Hatu-udu, Maubisse, Ainaru Vlla, no ami to’o iha Dili horiseik kedas, hela iha Karantina Tasi-tolu no daudaun ne’e ami halo hela prepsrasaun”, nia haktuir.
Iha fatin hanesan, Xefe tékniku KO munisípiu Baukau, João Inacio Freitas hateten, preparasaun ne’ebé sira halo daudaun ne’e koa hela besi hodi halo espanduk (banner). “Ami ekipa nain-ualu daudaun ne’e ami ko’a hela besi hodi halo espanduk hodi tau dezeñu istóriku munisípiu nian”.
Nia hatutan materiál sira ne’e hafoin sira to’o Dili mak foin sosa no uza orsamentu ne’ebé MAE distribui ba kada munsípiu.
Tuir observasaun jornalista nian kuaze KO husi kada munisípiu sira konsentra ona iha Portu Dili hodi halo preparasaun ba epozisaun feira nasionál nian.
Aleinde ne’e MAE mós servisu hamutuk ho liña ministeriál sira seluk hanesan MCI, EDTL, PAM Dili hodi apoiu mós lixeiru iha Portu Dili.
Jornalista: Alexandra da Costa
Editór: Rafael Ximenes de A. Belo
