Abitante Ermera ho autoridade solisita Ajénsia TATOLI servisu ho profisionál no responsabilidade
DILI, 08 Jullu 2026 (TATOLI)—Relasiona ho aniversáriu Ajénsia Notisioza TATOLI ba da-X (27/07/2016-27/07/2026), abitante hosi Munisípiu Ermera ho nia Prezidente Autoridade Munisípiu parabeniza no solisita TATOLI atu servisu ho profisionál no responsabilidade ba publikasaun informasaun sira ba públiku.
Nune’e, Prezidente Autoridade Munisípiu Ermera, José Martinho dos Santos, hateten publikasaun informasaun tenke kredivel no balansu.
“Ba Munisípiu Ermera presiza fó-sai informasaun kona-ba nesesidade ekonomia merkadu no informasaun ne’ebé liga ho povu nia moris no fó-sai informasaun ne’ebé kredivel,” nia dehan ba TATOLI iha nia knaar fatin, foin lalais ne’e.
Autoridade Munisipál ne’e hatutan maski jornalista destakadu laiha maibé TATOLI nafatin fó-sai informasaun ligadu ho dezenvolvimentu Munisípiu Ermera nian.
“Informasaun sira-ne’ebé TATOLI fó-sai ne’e importante ba ema hotu-hotu atu konsome, tanba ne’e, ha’u enkoraja imi jornalista TATOLI atu halo servisu ho di’ak no responsabilidade ba ita-nia rai no povu ida-ne’e,” nia dehan.
Aleinde ne’e, informasaun kona-ba kultura Ermera nian, Xefe Suku Urahou, Júlio da Costa hateten, TATOLI presiza mós halo kobertura kona-ba kultura hodi sidadaun husi munisípiu ida ba munisípiu seluk bele asesu no hatene idaidak nia lala’ok.
“Ita presiza aumenta tan informasaun kona-ba kultura. Maibé, atu dehan ba ita katak ami iha área rurál labele asesu informasaun hosi TATOLI ho másimu tanba internet,” Xefe Suku Urahou, Postu Administrativu Hatulia B, Munisípiu Ermera dehan.
Nune’e, nia husu ba jerente TATOLI atu halo planu kobertura hodi kobre mós atividade no setór importante sira iha Ermera.
“Ami presiza tebes ita-boot sira mai kobertura iha ami-nia suku, hodi hatene ami-nia atividade tanba povu barak halerik ba dalan hodi transporta sira-nia produtu bá Ermera Vila. Hosi ita-boot sira-nia kobertura mak ema boot sira iha nasionál bele hatene no bele tau iha planu orsamentu sira tuirmai,” nia dehan.
Iha parte seluk, Maria da Costa nu’udár abitante dehan informasaun iha TATOLI ne’e mesak kobre de’it nasionál, ba área rurál laiha.
“Entaun, ha’u-nia sujestaun mak presiza kobre mós área rurál tanba iha-ne’e mak problema barak no oioin, liga ba estrada, bee-moos, ahi, eskola, saúde no sei barak tan,” nia tenik.
Tuir nia, mídia Estatál ne’e loloos kobre territóriu la’ós konsentra de’it iha nasionál. Polítika kobertura iha área rurál mak lori ba nasionál buka nia solusaun.
“Parabens Ajénsia Notisioza TATOLI ba da-X, espera sai mídia ka kanál matan, tilun ba komunidade liuliu iha área rurál,” Maria hateten.
Jornalista: Osória Marques
Editór: Xisto Freitas da Piedade
