DILI, 19 Maiu 2025 (TATOLI) – Timor-Leste restaura nia independénsia ba da-23 iha 20 Maiu, aban. Hodi komemora loron ne’e, Governu hamutuk ho sarani sira selebra misa agradesimentu iha Igreja Parókia Imaculada Conceição, Balide, Dili.
Partisipa iha selebrasaun misa ida-ne’e, Primeiru-Ministru, Xanana Gusmão, hamutuk ho membru Governu, deputadu sira no povu Timor-Leste. Misa ne’e prezide husi Pe. Jovito Rêgo de Jesus Araújo.
Iha nia omília Pe. Jovito hateten susesu ba ukun-rasik an ne’e iha xavi tolu mak bensaun, perdaun no hadomi malu.
“Ita hotu tenke sai bensaun ida, ita-nia hahalok, liafuan, adezaun ba saida de’it tenke sai bensaun ida. Tanba bensaun ida-ne’e Maromak haraik mai ita. Ita hotu ne’ebé sai husi 1974 mai ne’e hatene katak bensaun, tanba ukun rasik an ne’e la’os prezente maibé ne’e bensaun”, Pe. Jovito hateten ohin.
Nia dehan ko’alia kona-ba xavi daruak ne’e perdaun mak presiza perdua malu no perdaun ne’e tenke ho laran, labele fó perdaun tanba motivu ida.
“Xavi ikus mak hadomi malu. Hanesan iha evanjellu hateten ha’u hadomi imi, ne’e sasukat ita presiza tebes. Dalaruma ema hanoin selebrasaun 20 Maiu ne’e ba ema ukun-na’in sira de’it, maibé ne’e timoroan sira hotu. Ita presiza perdaun ida-ne’e sai bensaun ida no besauun ida-ne’e presiza hadomi malu atu ukun-rasik an ida ne’e la’o di’ak tebes”, dehan.
Iha misa ne’e, Pe. Juvito mós lori povu nia naran hakarak hato’o obrigadu ba ukun-na’in sira ne’ebé hala’o knaar iha rai-ida ne’e.
“Ami-nia obrigadu ba imi iha loron ida -ne’e. Imi la perfeitu duni, maibé ami mós la hatene katak sá oportunidade atu la’o, dalabarak ami-nia ibun, hahalok, kolaborasaun la tulun imi hala’o ukun ida-ne’e. Ba ida-ne’e ami husu deskulpa, tanba dalabarak ami la hatene koopera, kolabora programa Governu nian, ami tolok, trata, maibé ami husu ita-boot sira-nia pasiénsia keta neon-nakraik hakat ba oin”, nia hato’o.
Saserdote ne’e mós husu atu hamutuk buka mekanizmu di’ak, nune’e ukun rasik an ida-ne’e di’ak no la’o ba oin, “tanba hamutuk ho imi, povu sente katak iha dalan ne’ebé loos”.
Hafoin misa agradesimentu, membru Governu, deputadu sira, inklui sarani lori kedas ai-fuan ba kari iha Semitériu Santa Krús, Dili.
Ba tinan ida-ne’e, komemorasaun Loron Restaurasaun Independénsia ho tema mak “Hametin pás no dezenvolvimentu”.
Notísia relevante: Espozisaun 20 Maiu: Kada munisípiu aprezenta progresu serbisu no produtu lokál
Jornalista: Arminda Fonseca
Editora: Maria Auxiliadora
