DILI, 19 Maiu 2025 (TATOLI) – Estudante timoroan sira iha sidade Guangzhou, Xina, ho espíritu nasionalizmu realiza misa agradesimentu ba komemorasaun Loron Restaurasaun Indepedénsia Timor-Leste nian ba da-23 iha 20 Maiu.
Misa ne’e dirije husi Padre John iha Kapela São Francisco de Assis, Guangzhou, iha loron 18 fulan-Maiu.
Prezidente Asosiasaun Estudante Timoroan iha Xina (ATSC, iha portugés), Esmeraldito Ferreira, hateten objetivu sira realiza misa ne’e mak nu’udar forma respeitu ba istória luta nasaun nian no maski sira dook husi sira-nia rai, maibé espíritu nasionalizmu metin.
“Maski dook husi Timór, maibé ami la haluha loron espesiál rai doben Timor-Leste nian. Tanba ami iha rai-li’ur mós hanesan embaixadór ki’ik ne’ebe reprezenta ita-nia nasaun iha kada eskola no kada sidade”, Esmeraldito Ferreira hateten ba Tatoli via telefone, ohin.
Nia salienta misa ne’e la’ós de’it forma agradesimentu ba ukun an nian, maibé mós nu’udar promesa ba erói sira ne’ebe sakrifika buat hotu ba nasaun nia ukun-rasik an.
“Ami mós halo orasaun ba líder nasaun nian oinsá atu hametin unidade, pás, no estabilidade hodi lidera nasaun no povu RDTL ho di’ak. Tanba ita liberta ona pátria no presiza mós liberta povu husi ki’ak, terus no seluk tan”, dehan.
Misa ne’e realiza mai husi inisiativa estudante mestradu na’in-sia no lisensiatura na’in-haat. Atividade ne’e reflete espíritu solidariedade no domin husi joven diáspora Timor-Leste nian ba sira-nia rai, nune’e mós hakarak atu kontinua apoia dezenvolvimentu nasionál, maski dook husi sira rai.
Notísia relevante: Pe. Jovito: Susesu ba ukun-rasik an mak perdaun, bensaun no hadomi malu
Jornalista: Arminda Fonseca
Editora: Maria Auxiliadora
