DILI, 27 Maiu 2025 (TATOLI)—Parlamentu Nasionál (PN), liuhusi reuniaun plenária, tersa ne’e, aprova ona pedidu asentimentu kontinuasaun ba deslokasaun ofisiál Prezidente Repúblika, José Ramos Horta bá Singapura entre loron 29 Maiu to’o 04 Juñu 2025.
Pedidu viajen ofisiál referidu hetan aprovasaun tanba relasiona ho kompromisu institusionál ne’ebé halo ona ho misaun diplomátika Timor-Leste iha Singapura.
“Autorizasaun ne’e konsede ho votu afavór 33, kontra tolu no abstensaun tolu, ho nune’e pedidu Prezidente Repúblika nian pasa,” Prezidente Parlamentu Nasionál (PPN) interinu, Alexandrino Afonso, fó sai durante sesaun plenária, PN.
Notísia relevante : Parlamentu autoriza PR Horta halo vizita ofisiál bá Singapura
Tuir testu Prezidénsia ne’ebé lee sai husi Sekretária Meza, Virgínia Belo, hateten, tuir termu previstu husi númeru 1 iha artigu 80 no alinea h númeru 3 artigu 95 iha Konstituisaun, ho meiu ne’e Prezidente Repúblika solisita ba PN konsentimentu préviu deslokasaun ofisiál bá Singapura, ho objetivu atu partisipa iha enkontru ofisiál ne’ebé organiza husi Embaixada Timor-Leste iha Singapura iha loron 03 Juñu 2025, iha okaziaun selebrasaun tinan 23 aniversáriu restaurasaun independénsia nasionál.
Iha dokumentu ne’e mós haktuir, inisiativa diplomátika ne’e mós ajenda ona hodi aproveita prezensa vizita ofisiál iha nasaun ne’e hodi hasoru malu ho entidade a’as hanesan Xefe Estadu Singapura, membru akreditadu husi korpu diplomátiku, reprezentante husi sosiedade sivíl, setór emprezariál no komunidade timoroan ne’ebé hela iha Singapura.
Relasiona vizita ofisiál ne’e, iha sorin seluk Embaixadór Timor-Leste iha Singapura, Alex Tilman, informa ba Ajénsia TATOLI katak durante Prezidente Repúblika ninia estadia iha Singapura, sei partisipa mós iha Diálogu Shangri-La, ne’ebé hanesan fórum prinsipál ida husi seguransa no defeza internasionál iha rejiaun Ázia-Pasífiku, nune’e mós hala’o enkontru sira ho ninia omólogu Singapura, Tharman Shanmugaratnam inklui Primeiru-Ministru Singapura, Lawrence Wong Shyun Tsai.
Jornalista : Arminda Fonseca
Editora : Julia Chatarina
