KOVALIMA, 11 Juñu 2025 (TATOLI) – Reprezentante Sekretáriu Estadu Protesaun Sívil, Gui Caeiro, hamutuk ho reprezentante Prezidente Autoridade munisípiu Kovalima ho Autoridade Protesaun Sívil (APC, Sigla portugés) Kovalima, Kuarta-ne’e, distribui materiál rekuperasaun no entrega orsamentu Mão de obra ba vítima dezastre naturál iha 2023 – uma-kain 42, iha munisípiu Kovalima.
Vítima sira ne’ebé simu materiál rekuperasaun no orsamentu Mão de obra mai husi postu administrativu sira hanesan Postu administrativu Fohorem, Fatululik, Fohorem, Tilomar, Maukatar, Suai no Zumalai.
Reprezentante Sekretáriu Estadu Protesaun Sívil, Gui Caeiro dehan, Governu fó apoiu materiál rekuperasaun no osan ba uma-kain 42 ho montante hamutuk $ 35,700 ne’ebé fahe ba kategoria hanesan uma aat kmaan, aat naton no aat totál.
“Materiál konstrusaun ho osan ne’ebé fó apoiu ba atu uza tuir nia dalan. Orsamentu ne’ebé fó apoiu ho nia kategoria ba uma aat totál osan $ 1000, aat naton $ 750 no aat kmaan $ 600”, Gui Caeiro, hato’o iha nia diskursu molok atu entrega materiál rekuperasaun no osan iha kampu Ladi, ohin.
Reprezentante membru ezekutivu ne’e ne’e fó atensaun ba vítima dezastre sira atu uza osan kusta transporte ho di’ak nune’e bele konstrui fali uma, tanba Polísia Nasionál Timor-Leste (PNTL) sei halo monitorizasaun.
Durasaun tempu ba vítima dezastre ne’ebé simu ona materiál rekuperasaun atu konstrui fali uma durante fulan tolu tenke finaliza ona no konstrusaun uma labele iha fatin ne’ebé risku ba dezastre naturál.
Reprezentante Prezidente Autoridade Munisípiu Kovalima João Martins husu komunidade atu konstrui uma tanba Governu apoiu ona materiál rekuperasaun.
“Ita-boot (vítima) sira koopera ho autoridade lokál atu konstrui ita-boot sira-nia uma ne’ebé hetan estragu iha momentu mosu dezastre naturál”, nia fó hanoin.
Autoridade Kovalima mós fó hanoin ba vítima dezastre naturál kumpri prazu ne’ebé fó atu finaliza konatrusaun uma bainhira la halo konstrusaun hetan sansaun bazeia ba lei ne’ebé vigora ona.
Vítima dezastre naturál Cecilia da Costa sente orgullu tanba Governu bele fó apoiu materiál rekuperasaun nune’e bele rekonstrui sira-nia uma ne’ebé afetadu hosi dezastre naturál.
“Ha’u sente orgullu tanba bele hetan apoiu materiál rekuperasaun husi Governu nune’e nia garante durante fulan tolu bele finaiza ona konstrusaun uma”, nia garante.
Jornalista:Celestina Teles
Editór: Rafael Ximenes de A. Belo
