KOVALIMA, 11 Juñu 2025 (TATOLI) – Ministériu Edukasaun (ME) reprezenta hosi Diretór Nasionál Infraestrutura Edukativa hamutuk ho Embaixadór Japaun iha Timor-Leste akompaña husi Autoridade munisípiu Kovalima inaugura konstrusaun edifísiu Eskola Bázika Filiál (EBF) Harekain, iha Suku Raimea, Postu administrativu Zumalai, Munisípiu Kovalima.
Estabelesimentu ensinu ne’ebé inaugura ne’e kompostu husi sala-de-aula tolu no sala ba profesór ida, kompleta ho kadeira ho meza ne’ebé fundu asisténsia husi povu Japaun iha tinan-2023 ne’e.
Diretór Nasionál Infraestrutura Edukativa ME, Helio Lopez, esplika katak povu Japaun liuhusi nia embaixada la’ós foin mak fó apoiu haree ba iha setór edukasaun de’it maibé apoia mós iha setór sira seluk.
“Los duni ita-nia kondisaun infraestrutura nia kondisaun aat; sala-de-aula rihun ida-resin iha kondisaun aat maske Governu rezolve ona sala-de-aula balun maibé to’o ohin loron mós rezolve seidauk hotu. Ho tulun husi ita-nia parseiru konsege hadi’a infraestrutura balun”, Helio Lopez hato’o iha nia diskursu molok inaugura edifísiu EBF Harekain, iha Suku Raimea, Zumalai, ohin.
Ho nune’e, ME hato’o agradesimentu embaixadór Japaun iha Timor-Leste tanba ho vontade nafatin loke dalan fó apoiu ba alunu timor-oan sira hodi oferese fasilidade sala-de-aula ne’ebé dignu hodi bele partisipa ensinu aprendizajen ho di’ak liu.
Hafoin inaugura presiza atu kuidadu eskola, maske buat balun sei falta, ME konsidera prioridade ne’ebé identifika mak presiza morru, fasilidade koziña no seluktan.
Embaixadór Estraordináriu Plenipotensiáriu Japaun ba Timor-Leste, Kimura Tetsuya informa, Empreza lokál Mahon mak implementa projetu hodi konstrui edifísiu EBF Harekain iha Suku Raimea, Postu administrativu Zumalai, Munisípiu Kovalima.
“Ha’u hein katak eskola ne’e fatin mehi no aspirasaun ba alunu sira, fó kbiit ba sira atu foti sira-nia pasu dahuluk ba sira-nia futuru ne’ebé nabilan. Ami hein atu serbisu hamutuk ho ita-boot sira hotu hodi apoia alunu no komunidade iha tinan sira tuirmai”, nia dehan.
Implementasaun projetu referidu, Governu Japaun apoia osan hamutuk $ 72,992 liuhusi ninia skema Grant Assistance for Grassroots Projects (GGP) – Subvensaun Asisténsia ba Projetu sira iha Baze, no Seguransa Umanu.
GGP maka programa governu Japaun nian ne’ebé fornese asisténsia finanseira ba projetu dezenvolvimentu sira iha nasaun sira ne’ebé sei dezenvolve hela. Objetivu GGP nian maka atu apoia organizasaun sira ne’ebé la’ós lukrativu, hanesan ONG sira, eskola sira, ospitál sira no instituisaun peskiza sira, hodi implementa projetu sira ne’ebé fó benefísiu diretamente ba komunidade lokál sira.
Projetu ne’e konstrui edifísiu eskola foun ida ho sala-de-aula tolu no sala ba profesór ida, ne’ebé fó benefísiu ba alunu no profesór iha EBF Harekain.
Governu Japaun lansa projetu ba dahuluk iha tinan-2000, projetu hamutuk 141 ne’ebé implementa tuir eskema GGP, iha munisipiu 13 hotu iha Timor-Leste.
Projetu ne’ebé implementa prinsipal fó asisténsia infraestrutura komunitária, inklui konstruisaun reabilitasaun ba instalasaun eskolár sira, klínika públika sira, no sistema fornesimentu bee hodi hatan ba nesesidade umana bázika oioin iha baze.
Reprezentante Autoridade Munisípiu Kovalima, Filomeno Cardoso reitera katak parseiru sira tulun Timor-Leste la’ós haree ba setór Edukasaun de’it maibé presiza mós fó tulun iha área seluk.
“Ita presiza ema hotu nia tulun Japaun liuhusi embaixadór tulun ita konstrui eskola bázika filiál Harekain,” nia reforsa.
Jornalista:Celestina Teles
Editór: Rafael Ximenes de A. Belo
