DILI, 20 Juñu 2025 (TATOLI)-Diretór Nasionál Rekursu Umanu iha Ministériu Edukasaun (ME), João Amaral, hatete profesór bolsa kandidatu faze daruak balun seidauk submente hotu bom komportamentu, ne’ebé sei hein hafoin bele koloka sira.
“Ami simu hotu ona sira-nia dokumentu maibé sei hein profesór sira balun trata hela bom komportamentu hafoin koloka sira ba eskola sira ne’ebé presiza”, Diretór Nasionál Rekursu Umanu dehan ba TATOLI iha nia knaar fatin Vila Verde, sesta ne’e.
Nia mos dehan daudaun ne’e sei extende kolokasaun tanba manorin sira seidauk entrega hotu sira-nia dokumentu, no sei koloka sira iha fulan-Agostu.
“Ita komprende katak atu bom komportamentu mós presiza tempu mak foin bele hotu, ne’ebé ita nafatin hein sira bainhira mak sira bele kompleta dokumentu. Maibé tenke aselera nune’e bele koloka ona”, nia dehan.
Ministériu Edukasaun planea sei koloka bolsa kandidatu faze daruak hamutuk 187 ba ensinu báziku primeiru no segundu sikulu sira iha territóriu.
Submisaun dokumentu ba bolsa kandidatu faze daruak hahú ona iha loron 3 to’o 13 Juñu 2025.
Bazeia ba despasu Ministra Edukasaun ho númeru 044/GMME/VIII/2024, loron 23 agostu 2024 neʼebé aprova bolsa kandidatu ba grupu rekrutamentu primeiru siklu no segundu siklu ensinu báziku ho kandidatu 2441. Bazeia ba despasu ministra númeru 5/2025 loron 13 Fevereiru 2025 ne’ebé aprova atualizasaun lista finál integrasaun bolsa kandidatu ho totál hamutuk 1.296.
Nune’e Diresaun Nasional Rekursu Umanu aviza ba kandidatu sira ho númeru seriasaun 8, 72, 103, 110, 117, 130, 133, 140, 145, 156, 179, 183, 185, 187, 190, 199, 200 no hosi númeru seriasaun 225 até 394, ne’ebé inklui hosi pontuasaun 65, 64 no 63.
Notísia relevante: ME planea xamada bolsa kandidatu profesór 150-resin iha fulan-Maiu
Jornalista : Osória Marques
Editora : Rita Almeida
