DILI, 09 Maiu 2025 (TATOLI)-Ministériu Edukasaun liuhusi Diresaun Nasionál Rekursu Umanu, planea ona hodi halo xamada ba bolsu kandidatu profesór 150-resin iha Maiu ne’e.
Jurista Ministériu Edukasaun, Bárbara Oliveira, akresenta liután daudaun ne’e bolsa kandidatu ne’e Siklu 1 no 2, Ensinu Báziku nian ne’ebé depois koloka ona iha momentu ne’ebá. Ne’ebé sei iha hela ho kandidatu 1.259 liuhosi Despasu Ministeriál númeru 05/2025, 13 Fevereiru.
“Tuir informasaun Ministériu Edukasaun fahe iha fulan-Maiu espera sei halo xamada ba 150-resin kandidatu iha bolsa kandidatu atu taka vaga ne’ebé maihosi dosente mate no reforma”, dehan ba jornalista sira bainhira desimina informasaun kona-ba profesór no bolsa kandidatu iha Vila Verde, sesta ne’e.
Nia hatutan ho reforma obrigatória ne’ebé aprova ona, espetativa katak sei halo xamada ba kandidatu kuaze hotu iha bolsa kandidatu atuál ba ensinu báziku siklu 1 no 2 iha tinan 2026.
ME desimina regra kona-ba professor bolsa kandidatu ba jornalista
Ministériu Edukasaun (ME) liuhusi Gabinete Relasaun Públika no Protokolu, sesta ne’e, desimina regra edukasaun ne’ebé haree liubá rekrutamentu profesór no bolsa kandidatu ba jornalista sira.
“Ohin ita fó informasaun kona-ba regra no prosedimentu kona-ba profesór no bolsa kandidatu ba jornalista sira, para oinsá mak bele halo kobertura iha área edukasaun nian”, Diretór Gabinete Relasaun Pùblika no Protokolu, Olandino Godinho, hatete iha Ministériu Edukasaun, Vila Verde.
Nune’e nia dehan bele kontribui informasaun ne’ebé loos no di’ak ba públiku tanba dalabarak vagatura bolsa kandidatu no kolokasaun ema la komprende, tanba ne’e liuhusi workshop ne’e bele aumenta koñesementu ba sira jornalista no hafasil iha kobertura.
“Objetivu husi workshop ne’e atu ita halo esplikasaun kona-ba kritériu no prosedimentu rekrutamentu dosente ba munisípiu sira. Ida-ne’e fó opurtunidade ba jornalista no hatán sira nia duvida relevante edukasaun nian”, nia dehan.
Bárbara Oliveira dehan importante ba ME mak kuadru pesoál hanesan instrumentu ne’ebé determina profesór sira mak eskola ida presiza.
Nia hatutan dalabarak eskola seidauk toman atu uza kuadru pesoál tanba buat ida foun no sei presiza tempu uitoan atu eskola rasik bele hatene jere sira-nia rekursu umanu tuir kuadru pesoál.
“Dala ruma mós, tuir esplikasaun, eskola la’ós laiha dosente, maibé iha dosente ne’ebé la hanorin tanba moras prolongadu ka razaun seluk. Bolsa Kandidatu nu’udar mekanizmu atu garante rekrutamentu no kolokasaun dosente iha kuadru pesoál tuir prosesu bazeia ba méritu. Sira ne’ebé kolokadu iha bolsa sei presiza hein xamada bainhira iha vaga iha kuadru pesoál eskola nian”, nia esplika.
Nia esplika bolsa kandidatu halo tuir nível ensinu, no iha tinan 2024 halo bolsa kandidatu ba Pré-Eskola no Siklu 3 ensinu báziku ne’ebé agora laiha ona tanba koloka kandidatu sira hotu.
Notísia relevante: ME rejistu ona kandidatura ba vaga sekundáriu hamutuk 16.437
Jornalista : Osória Marques
Editora : Rita Almeida
