Estudante na’in-sia iha Baukau sei tuir ezame nasionál iha segunda emisaun
BAUKAU, 23 Outubru 2026 (TATOLI)—Estudante na’in-sia (9) husi Munisípiu Baukau ne’ebé la konsege tuir Ezame Nasionál 2026 durante semana ne’e tanba problema saúde sei hetan oportunidade atu tuir ezame iha segunda emisaun, hafoin autoridade edukasaun submete ona sira-nia naran ba nivel nasionál.
Diretór Servisu Munisipál Edukasaun (SME) Baukau, Afonso dos Santos da Costa, esplika katak estudante hirak-ne’e sei hein desizaun no kalendáriu ofisiál husi autoridade edukasaun nivel nasionál kona-ba data no fatin atu hala’o ezame segunda emisaun.
“Sira hein oras no data husi nivel nasionál, maibé posibilidade mak iha semana rua tuirmai. Kona-ba fatin ezame, bele hala’o iha edifísiu Edukasaun ka iha eskola idaidak,” Afonso dos Santos da Costa hateten ba TATOLI iha nia fatin servisu, Vila Nova, Baukau, Sesta ne’e.
Afonso relata katak husi estudante na’in-sia ne’e, na’in-haat mak estudante feto husi Ensinu Sekundáriu Jerál (ESJ). Estudante na’in-tolu seluk mak husi Ensinu Báziku, kompostu husi feto na’in-rua no mane ida. Enkuantu, estudante na’in-rua mak husi Ensinu Tékniku-Vokasionál, ne’ebé hotu-hotu mane.
Estudante na’in-rua husi Ensinu Tékniku-Vokasionál rejistadu iha Eskola Tékniku-Vokasionál Katólika no Ensinu Tékniku Informatika (ETI). Estudante Ensinu Sekundáriu Jerál rejistadu iha ESJ Filial Aubaka, ESJ Filial Laga, ESJ Paralelu Laisorulai no ESJ Sakorje.
Enkuantu, estudante na’in-tolu husi Ensinu Báziku rejistadu iha Sentru Ensinu Báziku (EBC-sigla portugeza) Buruma, EBF Buibau no EBF Katólika São Francisco Samalari.
“Jeralmente, Ezame Nasionál ba tinan ne’e la’o ho di’ak, no materiál ezame nian transfere ona ba nivel nasionál,” Afonso akresenta.
SME Baukau konsidera katak implementasaun Ezame Nasionál 2026 iha munisípiu ne’e la’o ho susesu, tanba laiha problema boot ne’ebé atrapalla prosesu, inklui problema klimátiku ka seguransa. Situasaun ne’e konsidera hanesan sinál pozitivu, maski rezultadu ezame sei sai depoizde prosesu korresaun ramata.
Tuir dadus SME Baukau, estudante hamutuk na’in-5.131 rejistadu tuir Ezame Nasionál 2026 iha munisípiu ne’e.
Husi totál ne’e, estudante na’in-2.594 mak husi Ensinu Báziku, kompostu husi mane na’in-1.258 no feto na’in-1.336.
Enkuantu, estudante na’in-2.311 mak husi Ensinu Sekundáriu Jerál, kompostu husi mane na’in-1.027 no feto na’in-1.284.
Estudante na’in-226 seluk mak husi Ensinu Tékniku-Vokasionál, kompostu husi mane na’in-111 no feto na’in-115.
SME Baukau mós prepara sentru ezame nasionál hamutuk 73, kompostu husi sentru Ensinu Báziku hamutuk 43, Ensinu Sekundáriu Jerál hamutuk 27 no Ensinu Tékniku-Vokasionál hamutuk lima (5).
Kontekstu
Ezame Nasionál 2026 ba estudante finalista iha Timor-Leste hahú iha 19 Outubru 2026. Iha Munisípiu Baukau, autoridade edukasaun rejista estudante na’in-5.131 tuir ezame iha nivel Ensinu Báziku, Ensinu Sekundáriu Jerál no Ensinu Tékniku-Vokasionál.
Antes ne’e, iha 19 Outubru 2026, TATOLI relata katak estudante na’in-rua iha Baukau la konsege tuir ezame nasionál iha loron dahuluk tanba problema saúde. Autoridade edukasaun informa katak estudante hirak-ne’e sei hetan oportunidade atu tuir ezame fali bainhira kondisaun saúde permite, tuir desizaun no prosedimentu ne’ebé estabelesidu.
Lee notísia relevante: Estudante na’in-rua la tuir ezame nasionál iha Baukau.
Iha nivel nasionál, estudante hamutuk na’in-51.188 rejistadu partisipa iha Ezame Nasionál 2026, inklui estudante husi Ensinu Báziku, Ensinu Sekundáriu Jerál no Ensinu Sekundáriu Tékniku-Vokasionál. Autoridade edukasaun mós informa katak estudante sira-ne’ebé hasoru problema saúde ka kondisaun espesífika bele hetan apoiu apropriadu tuir nesesidade no prosedimentu ne’ebé aplikadu.
Lee mós: Estudante na’in-sia la tuir Ezame Nasionál iha ESJ 10 no ESJ 05 Maiu.
Jornalista: Natalino Belo
Editór: Xisto Freitas da Piedade
