Estudante na’in-rua la tuir ezame nasionál iha Baukau
BAUKAU, 19 Outubru 2026 (TATOLI)—Estudante na’in-rua la konsege tuir Ezame Nasionál 2026 ba loron dahuluk iha Munisípiu Baukau, Segunda ne’e, tanba kondisaun saúde la permite (moras).
Diretór Servisu Munisipál Edukasaun (SME) Baukau, Afonso dos Santos da Costa, informa katak estudante rua ne’e rejista iha eskola rua diferente. Estudante feto ida husi Eskola Bázika Filiál Buruma, iha Postu Administrativu Baukau Vila, no estudante mane ida husi Eskola Ensinu Sekundáriu Jerál Laisorulai, iha Postu Administrativu Matebian.
Afonso husu ba estudante no inan-aman sira atu tau-atensaun ba saúde no preparasaun durante períodu ezame, inklui asegura estudante sira deskansa ho sufisiente.
“Husu ba estudante sira no inan-aman sira atu haree ba sira-nia oan ne’ebé tuir ezame. Ita hotu presiza kolabora atu fó-hanoin ba sira katak tenke toba sedu, atu prepara an ba loron hirak-ne’e no bele tuir ezame ho di’ak,” Afonso dos Santos da Costa hateten iha nia fatin servisu, Baukau.
Nia esplika katak estudante rua ne’e sei hetan oportunidade atu tuir ezame fali bainhira kondisaun saúde permite, tuir desizaun no prosedimentu ne’ebé autoridade edukasaun estabelese. Se sira kontinua moras, sei hetan oportunidade atu tuir ezame iha segunda emisaun.
Afonso mós husu ba estudante sira seluk atu kuidadu saúde no evita atividade ne’ebé bele halo sira kolen, hodibele kontinua tuir ezame iha loron sira tuirmai.
Iha aspetu organizasaun, SME Baukau organiza estudante na’in-20 iha sala ezame ida, ho distánsia entre estudante ida ho estudante seluk másimu metru ida, no vijilante na’in-rua atu akompaña prosesu ezame.
“Kria distánsia ne’e atu estudante sira labele konversa malu ka haree ba estudante sira seluk iha oin, kotuk no sorin-sorin,” Afonso subliña.
Bazeia ba dadus SME Baukau, estudante hamutuk na’in-5.131 rejistadu atu tuir Ezame Nasionál 2026 iha munisípiu ne’e. Husi númeru ne’e, estudante na’in-2.594 mak husi ensinu báziku, kompostu mane na’in-1.258 no feto na’in-1.336.
Enkuantu, estudante na’in-2.311 mak husi ensinu sekundáriu jerál, kompostu mane na’in-1.027 no feto na’in-1.284. Estudante na’in-226 seluk mak husi ensinu tékniku-vokasionál, kompostu mane na’in-111 no feto na’in-115.
SME Baukau mós prepara sentru ezame nasionál hamutuk 73, kompostu husi sentru ensinu báziku na’in-43, ensinu sekundáriu jerál na’in-27 no ensinu tékniku-vokasionál na’in-lima (5).
Kontekstu
Antes ne’e, SME Baukau informa katak estudante na’in-5.131 sei tuir Ezame Nasionál 2026, ne’ebé hahú iha 19 Outubru. Preparasaun inklui identifikasaun sentru ezame, organizasaun responsabilidade no rekolla dadus estudante sira-ne’ebé rejistadu. Lee notísia relevante: notísia TATOLI kona-ba estudante na’in-5.131 ne’ebé sei tuir Ezame Nasionál iha Baukau.
Iha nivel nasionál, Ministra Edukasaun, Dulce de Jesus Soares, mós husu estudante finalista sira atu uza máskara durante ezame atu hamenus risku ba saúde respiratória tanba ahi-suar ne’ebé to’o ona iha Timor-Leste. Lee mós: notísia TATOLI kona-ba apelu Ministériu Edukasaun atu estudante sira uza máskara durante Ezame Nasionál.
Jornalista: Natalino Belo
Editór: Xisto Freitas da Piedade
