Estudante 5.131 sei partisipa Ezame Nasionál iha Baukau
BAUKAU, 15 Outubru 2026 (TATOLI)—Estudante hamutuk 5.131 husi ensinu báziku, ensinu sekundáriu jerál no ensinu tékniku-vokasionál iha Munisípiu Baukau sei partisipa iha Ezame Nasionál ne’ebé sei hahú iha loron 19 Outubru tinan ne’e.
Diretór Servisu Munisipál Edukasaun (SME) Baukau, Afonso dos Santos da Costa, hateten katak preparasaun ba ezame ne’e kompleta ona, inklui kria estrutura responsabilidade, identifika sentru ezame no halibur dadus kona-ba estudante sira-ne’ebé sei partisipa.
“Preparasaun hotu-hotu la’o ona, no agora ami hein distribuisaun materiál ezame nian husi nivel nasionál,” Afonso dos Santos da Costa hateten ba TATOLI iha nia servisu fatin, Vila Nova, Baukau, Kinta ne’e.
Nia esplika katak husi estudante hamutuk 5.131, na’in-2.594 mak husi ensinu báziku, kompostu mane na’in-1.258 no feto na’in-1.336.
Enkuantu, estudante na’in-2.311 mak husi ensinu sekundáriu jerál, kompostu mane na’in-1.027 no feto na’in-1.284. Estudante na’in-226 seluk mak husi ensinu tékniku-vokasionál, kompostu mane na’in-111 no feto na’in-115.
SME Baukau hein katak ezame nasionál ne’e hala’o ho susesu no estudante hotu ne’ebé rejistadu bele partisipa tuir prosedimentu ne’ebé estabelese ona.
“Ami-nia espetativa mak ezame nasionál no ezame lokál bele hala’o ho susesu. Importante mak asegura estudante sira partisipa ho númeru aas,” nia dehan.
SME Baukau mós husu ba estudante sira atu kontinua prepara an, liuliu liuhusi revizaun matéria, kuidadu saúde no preparasaun mentál, hodi bele enfrenta ezame ho di’ak.
Ezame Nasionál ba tinan 2026 ne’e sei hahú iha loron 19 Outubru. Maibé, data no durasaun ezata ba ezame lokál sei fó-sai husi autoridade edukasaun hafoin ezame nasionál.
Kontekstu
Ministériu Edukasaun prepara ona materiál Ezame Nasionál ba estudante finalista klase 9.º ensinu báziku no klase 12.º ensinu sekundáriu jerál no tékniku-vokasionál. Iha 5 Outubru 2026, Koordenadór Gabinete Kurríkulu Unidade Nasionál iha Ministériu Edukasaun, João Maupelu, informa katak pontu ezame imprime ona no prosesu einpakotamentu ba materiál ezame hahú ona.
Lee notísia relevante iha TATOLI:
- Imprime ona Pontu Ezame Nasionál, agora tama faze einpakotamentu
- Ministra Dulce solisita estudante halo revizaun matéria ba preparasaun Ezame Nasionál
Jornalista: Natalino Belo
Editór: Xisto Freitas da Piedade
