PR: Reuniaun Konsellu Superiór Majistratura foku ba reforsa setór justisa
DILI, 23 Outubru 2026 (TATOLI)—Prezidente Repúblika, José Ramos-Horta, informa, kona-ba reuniaun Konsellu Superiór Majistratura Judisiária, (KSMJ) ne’ebé realiza horiseik foku ba situasaun iha setór justisa nian.
Xefe Estadu ne’e hatete nia labele komenta buat ne’ebé ko’alia iha reuniaun nia-laran ne’e maibé bele hatete de’it reuniaun ne’e realiza tanba nia rasik ho Primeiru-Ministru Xanana Gusmão mak husu Konsellu Superiór Majistratura Judisiária hothotu atu halo enkontru ida.
“Enkontru ne’e atu ko’alia nu’dar timoroan, nu’udar líder responsavel tékniku sira, ko’alia kona-ba situasaun iha setór justisa. Tanba ita hotu hakarak justisa ida-ne’ebé forte, kredivel,” Ramos-Horta hatete iha Palásiu Prezidensiál Bairru-Pité, kinta ne’e, hafoin jornalista husu rezultadu enkontru referidu, tanba horseik la hetan resposta ruma.
Notísia relevante:Xefe Estadu prezide reuniaun Konsellu Superiór Majistratura
Xefe Estadu ne’e afirma, reuniaun Konsellu Superiór Majistratura realiza tanba nia parte dala-ruma akompaña mídia sosiál públiku balun kestiona katak Prezidente Repúblika nonok hela la halo buat ruma kona-ba situasaun justisa nian.
“Maibé buat hotu Prezidente la’ós atu haksoit tama. Ha’u konvida sira mai halo enkontru tanba konstituisaun hatete papél Prezidente Repúblika nian atu haree hametin, instituisaun soberania, Konsellu Superiór Majistratura Judisiária mós oragaun soberanu ida,” nia dehan.
Tuir líder ne’e, Prezidente Repúblika nia mandatu obrigasaun tuir Konstituisaun atu haree tau matan ba funsionamentu regulár órgaun soberania.
Tanba ne’e, iha enkontru ne’e rona sira hothotu no idaidak nia informasaun idaidak nia opiniaun, tanba hakarak tane setór justisa, tanba prosesu instalasaun Tribunál Supremu la’o daudaun ona.
“Entaun reuniaun horiseik ne’e ha’u hanesan Prezidente haree hateke ba idaidak sira-nia ko’alia, sira-nia kontribuisaun ne’e di’ak rezolve problema ruma ka lae, nune’e reuniaun ramata ha’u hatete hato’o felisiasaun ba sira hothotu tanba sira simu todan boot nu’udar jurista, advogadu nu’udar juis, no prokuradór, sira hothotu iha setór justisa ne’e sira-nia kontribuisaun ba rin nasaun ne’e importante tebes,” nia konklui.
Jornalista: Arminda Fonseca
Editór : Rafael Ximenes de A. Belo
