Mari Alkatiri presta tan deklarasaun iha Ministériu Públiku
DILI, 05 Outubru 2026 (TATOLI)—Antigu Primeiru-Ministru, Mari Alkatiri, Segunda ne’e, mai iha Prokuradoria Jerál Gabinete Sentrál Korrupsaun no Kombatente Krime Organizadu (PGGCC, sigla portugés), Kolmera, hodi presta deklarasaun.
Alkatiri to’o iha edifísiu Ministériu Públiku (MP) iha tuku 10:30 ho nia karreta privada no akompaña husi nia Advogada Privada, Soraya Marques no Korpu Seguransa Pesoál.
Alkatiri presta deklarasaun ba prosesu ho NUC O017/20.GCCCCO ba krime Administrasaun Danoza no krime seluk tan liga ho Ró Haksolok ne’ebé uluk nia sai hanesan Prezidente Autoridade Rejiaun Administrativa Espesiál Oékusi Ambeno (RAEOA) no Zona Espesiál Ekonomia Sosiál Merkadu (ZEESM).
Notísia relevante : Mari Alkatiri presta deklarasaun iha Ministériu Públiku
Durante dilijénsia iha MP, Antigu Primeiru-Ministru ne’e presta nia depoimentu sira liga ho prosesu sira ne’ebé MP konsta iha NUC ne’ebé MP fo sai.
Mari Alkatiri lakohi fó komentáriu kle’an kona-ba nia razaun presta deklaraun.
“Ha’u laiha obrigasaun atu hatán ba ita-boot, ha’u foin sai husi Ministériu Públiku,” Mari Alkatiri hato’o hafoin presta deklarasaun.
Nia husu atu públiku akompaña de’it prosesu ne’ebé la’o hela liga ho notifikasaun MP nian.
“Imi bele bá uma ona, hakarak akompaña de’it prosesu ne’e to’o fim,” nia akresenta.
Rekorda fali katak iha loron 25 Maiu, Antigu Prezidente RAEOA no ZEEMS kumpre uluk notifiksaun husi MP ba prosesu ho NUC 0036/25.PGGCC liga ho fraude fiskál.
Jornalista : Natalino Costa
Editora : Julia Chatarina
