DILI, 25 Maiu 2026 (TATOLI)—Eis Prezidente Autoridade Rejiaun Administrativu Espesiál Oekusi Ambeno (RAEOA) no atuál Sekretáriu Jerál Partidu FRETILIN, Mari Bin Amude Akatiri, Segunda ne’e, prestasaun deklarasaun ihaMinistériu Públiku ba akumulasaun projetu sira iha ZEESM.
Mari Alkatiri marka prezensa bazeia ba notifikasaun ho NUK 0036/25.PGGCC, ligadu ho kazu korrupasaun balun ho tipu abuzu poder, fraude fiskál bainhira sei asume kargu hanesan Prezidente RAEOA no ZEESM.
Eis Primeiru-Ministru (PM) ne’e to’o iha edifísiu Ministériu Públiku Gabinete Sentrál Korrupasaun no Kombate Krime Organizadu Kolmera iha Prokuradoria Jerál Repúblika, Kolmera iha tuku 9:35 dadeer, ho karreta privada xapa matríkula A.21.208 TL, akompaña husi nia eskoltu Korpu Seguransa Pesoál (CSP) no Advogada Privada, Soraya Marques, hodi la’o tama bá Gabinete no submete ba prosesu justisa.
Notísia relevante : Prezidente RAEOA Rogério Lobato prontu hatán Mari Alkatiri iha tribunál
Hafoin presta deklarasaun, Mari Alkatiri hateten, nia prezensa tanba respeita instituisaun judisiál.
“Tanba ha’u respeita Instituisaun Judisiária, la’ós hanesan seluk, kuandu bolu la mai, ha’u respeita maka ha’u mai,” Mari Alkatiri hateten ba Jornalista sira iha Prokuradoria Jerál Repúblika, Kolmera.
Eis PM hatutan, nia parte hakarak garante judisiáriu sai independente.
Alkatiri dehan, kona-ba nia estatutu hanesan suspeitu ka arguidu ne’e nia la hatene tanba segredu justisa.
“Husu ba sira iha laran ne’e, la’ós balun hakarak uza, saida maka presta iha laran ne’e segredu justisa,” nia katak.
Mari prontu to’o Tribunál ba kazu ne’ebé nia daudaun submete ba prosesu.
“Ha’u sai imi prontu akompaña de’it, luta ne’e foin hahú to’o aban bainrua. Ha’u nunka halai husi Tribunál no Ministériu Públiku hanesan ema balu,” nia afirma.
Entretantu, Mari Alkatiri ramata nia dilijénsia iha Ministériu Públiku iha tuku 11:00.
Jornalista : Natalino Costa
Editora : Julia Chatarina
