UNTL enkoraja estudante Komunikasaun Sosiál dezenvolve kriatividade liuhusi espozisaun no semináriu

DILI, 22 Outubru 2026 (TATOLI)–Universidade Nasionál Timor Lorosa’e (UNTL) kontinua enkoraja estudante sira atu dezenvolve kriatividade, aumenta koñesimentu no prepara an ba futuru liuhusi espozisaun obra estudante nian no semináriu iha tinan akadémiku 2026.

Vise-Reitór Asuntu Planeamentu, Monitorizasaun no Avaliasaun UNTL, Tomás Xavier Soares, apresia esforsu Fakuldade Siénsia Sosiál, liuhusi Departamentu Komunikasaun Sosiál, ne’ebé organiza atividade ho tema “Aprezentasaun Kriatividade no Obra Estudante liuhusi Atividade Espozisaun Tinan Letivu 2026”, iha Kampus Merah UNTL, Kaikoli, Dili.

“Ha’u apresia esforsu Departamentu Komunikasaun Sosiál ne’ebé konvida akadémiku, profesór no palestrante husi instituisaun seluk atu fahe koñesimentu no rezultadu peskiza ba estudante sira,” Vise-Reitór Tomás Xavier Soares dehan ba jornalista sira.

Nia konsidera atividade hanesan ne’e importante tebes atu hasa’e kualidade prosesu ensinu no aprendizajen iha universidade, liuliu tanba fó oportunidade ba estudante sira atu aprende diretamente husi esperiénsia no koñesimentu ema ne’ebé iha espesialidade iha área idaidak.

Vise-Reitór ne’e mós husu ba fakuldade no departamentu sira atu kontinua organiza atividade ne’ebé bele hametin kooperasaun entre universidade, akadémiku, peritu no parte interesada sira, inklui empreza, atu estudante sira bele hetan esperiénsia prátika ne’ebé útil ba sira-nia futuru.

Nia esplika katak kooperasaun entre instituisaun ensinu superiór no parte interesada sira importante atu prepara estudante ho koñesimentu no kapasidade ne’ebé presiza bainhira tama iha mundu servisu, nune’e bele fó kontribuisaun ba komunidade no sosiedade.

Iha oportunidade ne’e, nia mós fó ezemplu kona-ba kooperasaun ne’ebé hala’o iha Fakuldade Enjeñaria, liuliu Departamentu Enjeñaria Sivíl, ne’ebé bele sai referénsia ba fakuldade no departamentu sira seluk atu kontinua apoiu malu iha dezenvolvimentu akadémiku.

“Tanba ne’e, aproveita oportunidade husi atividade espozisaun no semináriu sira atu aumenta matenek, dezenvolve kapasidade no aprende husi esperiénsia ema seluk, nune’e bele sai profisionál ne’ebé kompetente no fó benefísiu ba nasaun iha futuru,” nia enkoraja.

Iha ramata nia intervensaun, Vise-Reitór UNTL agradese ba autoridade sira, akadémiku, profesór, palestrante no partisipante hotu ne’ebé kontribui ba realizasaun atividade ne’e. Nia mós enkoraja organizadór sira atu kontinua hala’o atividade hanesan ne’e iha futuru.

MESSK enkoraja universidade

Ministru Ensinu Superiór, Siénsia no Kultura (MESSK) Interinu, Mariano Assanami Sabino, enkoraja universidade sira atu hametin inovasaun, kriatividade, peskiza no kapasidade estudante sira-nian hodi prepara juventude Timor-Leste atu hasoru dezafiu dijitalizasaun no kompetitividade iha nivel rejionál.

Nia afirma katak kampus la’ós de’it fatin atu aprende teoria, maibé mós tenke sai fatin ba estudante sira atu halo prátika, realiza peskiza, dezenvolve inovasaun no hatudu sira-nia kriatividade.

“Estudante sira la’ós presiza iha matenek de’it, maibé tenke iha mós talentu, mentalidade di’ak no karakter ne’ebé forte. Matenek no karakter mak dimensaun rua ne’ebé tenke la’o hamutuk,” Ministru interinu ne’e dehan.

Nia konsidera katak espozisaun hanesan ne’e importante atu fó oportunidade ba estudante sira atu hatudu sira-nia talentu, kapasidade no rezultadu prátika, no prepara an atu hasoru dezafiu sira ne’ebé mosu husi dezenvolvimentu teknolojia no modernizasaun.

Mariano Assanami Sabino mós subliña importánsia komunikasaun sosiál iha hametin koezaun sosiál no dezenvolve demokrasia. Nia haktuir katak debate no diskusaun tenke bazeia ba razaun, argumentu no respeitu malu, la’ós atu hamenus ema seluk nia dignidade.

Nia enfatiza katak mídia tenke sai instrumentu atu promove troka hanoin, diskusaun konstrutiva no komprensaun entre sidadaun sira. Nia hateten katak diferensa hanoin la signifika katak ema tenke trata malu ho violénsia ka la respeita malu.

Iha aspetu seluk, Ministru Interinu ne’e esplika katak dignidade ema-nian la depende ba tipu servisu ne’ebé nia hala’o. Ema hotu tenke hetan respeitu hanesan, maski nia servisu nu’udár lideransa Estadu, funsionáriu, traballadór ka agrikultór.

Nia mós alerta katak Timor-Leste, nu’udár membru ASEAN, presiza kontinua hametin instituisaun, dezenvolve rekursu umanu no hasa’e kriatividade juventude nian atubele kompete iha merkadu rejionál.

“Tanba ne’e, ha’u husu ba universidade no instituisaun ensinu superiór sira atu kontinua fó espasu ba aprendizajen, peskiza, inovasaun no servisu ba komunidade, atu estudante sira bele sai profisionál ne’ebé iha kapasidade no karakter di’ak,” nia informa.

Semináriu internasionál aprezenta tópiku oioin

Espozisaun obra estudante nian iha tinan akadémiku 2026 ne’e mós inklui semináriu internasionál no vizita ba obra estudante sira, ne’ebé aprezenta iha área fotojornalizmu, jornál parede no artezanatu. Atividade ne’e hala’o durante loron tolu, hahú iha 22 to’o 24 Outubru 2026.

Iha loron dahuluk, 22 Outubru, oradór husi Sekretaria Estadu Komunikasaun Sosiál (SEKOMS), Expedito Dias Ximenes, hamutuk ho reprezentante no asesór SEKOMS, Augusto Sarmento, ko’alia kona-ba “Dezenvolvimentu no Inovasaun Dijitál iha Timor-Leste”.

Oradór internasionál, Arif Subekti aprezenta tópiku “Shared History Timor-Leste–Indonézia”, enkuantu oradór internasionál Akhirul Aminolloh ko’alia kona-ba “Democracy and Computational Propaganda in Digital Era”.

Iha sesaun lokraik, Ana Pereira, Adida Kooperasaun iha Embaixada Portugál iha Timor-Leste, aprezenta tópiku “A Língua Portuguesa na Era Digital: Educação, Comunicação e Oportunidade para os Jovens de Timor-Leste”.

Oradór Diretór Polísia Sientífika Investigasaun Kriminál (PCIC-sigla portugeza), Vicente Fernandes e Brito, ko’alia kona-ba “Husi Fingerprint ba IP Address hodi Proteje Komunikasaun Sidadaun iha Espasu Sibernétiku Nasionál”.

Iha 23 Outubru 2026, Xefe Redasaun Agência Noticiosa de Timor-Leste (TATOLI), Evaristo Soares Martins, sei aprezenta tópiku “TATOLI iha Era Dijitál: Husi Ajénsia Notísia ba Guardiaun ba Komunikasaun Kredível Kontra Fake News”.

Oradór seluk, Dacky Belo, sei ko’alia kona-ba “RTTL iha Era Teknolojia no Deepfake: Bainhira Lia Bosok Hatudu Oin Hanesan Lia-loos, Sé Mak Sei Fura Matan ba Povu”.

Iha loron ikus, 24 Outubru 2026, Vise-Prezidente Alumni Departamentu Komunikasaun Sosiál UNTL, Isaac de Oliveira, sei aprezenta tópiku “Impaktu Mídia Sosiál ba Komportamentu Juventude iha TL”.

Xefe Redasaun GMNTV, Aleixo da Costa, sei ko’alia kona-ba “Jestaun Redasaun Mídia Privadu iha Era Dijitál: Dezafiu Étika no Kredibilidade”.

Kontekstu

Atividade espozisaun obra estudante Departamentu Komunikasaun Sosiál UNTL ne’e la’ós inisiativa foun. Iha 11 Setembru 2025, UNTL liuhusi Fakuldade Siénsia Sosiál mós organiza espozisaun ne’ebé aprezenta obra estudante sira iha área fotojornalizmu, reportajen eskrita, dezeñu gráfiku no vídeo, hamutuk ho semináriu no talk show.

Iha tempu ne’ebá, Prezidente Komisaun Organizadora Espozisaun Obra Estudante, Apolónia Nunes, esplika katak atividade ne’e hahú ona iha 2019 no sai kultura ba Departamentu Komunikasaun Sosiál atu fó oportunidade ba estudante sira atu aprezenta obra kriativa, dezenvolve abilidade no aplika koñesimentu teóriku liuhusi prátika.

Lee notísia relevante: Espozisaun eleva estudante nia koñesimentu – TATOLI.

Iha 04 Jullu 2025, Sekretaria Estadu Komunikasaun Sosiál (SEKOMS) mós husu ba estudante UNTL sira atu uza mídia sosiál ho responsabilidade. Mensajen ne’e relevante ho semináriu akadémiku tinan 2026, ne’ebé inklui tópiku inovasaun dijitál, propaganda dijitál, deepfake no dezafiu informasaun falsa iha era teknolojia.

Lee mós: SEKOMS husu estudante UNTL tenke uza mídia sosiál tuir nia dalan – TATOLI.

Jornalista: Osória Marques

Editór: Xisto Freitas da Piedade