DILI, 25 Juñu 2025 (TATOLI)–Organizasaun naun governamentál Humanism Igniting Agency Inspiring Change liuhusi Mane Ho Vizaun Foun (MHVF) konvoka sorumutu ho organizasaun sosiedade sivíl sira-ne’ebé sai parseiru ba implementasaun projetu promove pás igualdade no direitu sivíl ba sosiedade inkluziva iha Timor-Leste (GoR-TL).
Projetu ida-ne’e hetan fundu husi Embaixada Norwega iha Jakarta ho montante $8.000, ba implementasaun programa durante fulan-neen no identifikasaun fatin bazeia ba kada organizasaun ninia meta.
Projetu GoR-TL sei foka liu ba ema ho defisiénsia, violénsia doméstika, grupu vulnerável bazeia ba idade no jéneru inklui minória seksuál sira.
“Projetu ida-ne’e la’ós foun maibé hala’o ona dala-rua, tanba ne’e ita konvida kolega parseiru sira mai hodi tau ideia hamutuk, aprezenta fali progresu ne’ebé antes ne’e iha no kria fali planu estratejia foun hodi kontinua halo advokasia ba suntu sosiál, liuliu kona-ba igualdade jéneru no inkluzaun sosiál,” Diretór MHVF, Américo de Araújo informa iha uma formasaun novisiasa Sta. Theresia madre PRR, Manleuana, Kuarta ne’e.
Notísia relevante : SEI organiza sorumutu kona-ba prevensaun primária hapara violénsia hasoru feto no labarik
Diretór ne’e esplika, organizasaun MHVF mak lidera implementasaun projetu tanba ne’e halo fali diskusaun hodi refleta ba aprendizajen iha pasadu no saida mak presiza halo fali iha tempu tuir mai hodi kontinua kapasita parseiru sira ba projetu ne’e.
“Ita mós iha mehi ida atu haree hamutuk halo pareser ba kestaun sosiál sira no submete ba Governu liuhusi Sekretaria Estadu Igualdade hodi sai pakote di’ak atu reforsa advokásia ka luta hasoru justisa iha Timor-Leste,” nia akresenta.
Projetu ne’e foka ba asuntu sosiál, tanba ne’e barreira boot ne’ebé sosiedade hasoru maka kestaun patriarkál, ne’ebé sei sai nafatin difikuldade hodi hasa’e no muda konsiénsia komunidade, maibé sosiedade sivíl la lakon esperansa hodi kontinua halo advokasia.
Atividade ne’e hetan partisipasaun husi KDT-TL, ACBIT, Casa Visa, La’o Hamutuk, PRADET, JSMP, Humanism, MAVF, Fokupers.
Atividade ne’ebé hala’o durante loron-rua, hahú ohin to’o aban, halo diskusaun no prátika.
Jornalista : Alexandra da Costa
Editora : Julia Chatarina
