DILI, 02 Jullu 2025 (TATOLI)—Ministra Saúde, Elia dos Reis Amaral, hato’o agradesementu ba Governu Japaun ne’ebé fó apoia millaun $20 ba Governu Timor-Leste atu harii maternidade foun iha Hospitál Nasionál Guido Valadares (HNGV).
“Ha’u hato’o agradesementu ba povu Japaun ne’ebé apoiu Timor-Leste atu harii maternidade foun iha HNGV, tanba ami halo ona asinatura MoU ho JICA ne’ebé mak define husi Governu Japaun ita hetan apoiu másimu husi povu Japaun. Ida-ne’e kontinuasaun atu harii konstrusaun ba maternidade foun, signifika pediatria ne’ebé mak iha sei iha liña koneksaun ba iha maternidade,” Ministra Elia dos Reis Amaral informa ba jornalista sira hafoin partisipa reuniaun Konsellu Ministru, iha Palásiu Governu, ohin.
Antes ne’e, kontratu ba servisu konstrusaun liuhusi JICA nia projetu Hadia Hospitál Nasionál Guido Valadares (HNGV) asina ona husi Ministériu Saúde no Wakachiku Construction Co, Ltd iha loron 27 Juñu 2025 iha Tokyo, Japaun.
Reprezenatnte Ministra Saúde, Diretór Jeral ba Servisu Koorporativa, Valentino Lisboa Marçal asina kontratu, ne’ebé sasin husi Conselor ba Embaixada Timor-Leste iha Japaun, Celio Moniz da Silva no Diretora Jerál ba Unidade Jestaun Projetu Saúde iha Ministériu Saúde, Adelia Maria Moniz Barreto.
Ho lideransa Ministra saúde no envolvimentu husi Ministériu Saúde, hein katak konstrusaun sei hahú iha Agostu 2025 no sei ramata iha Abril 2027.
Edifísiu foun sei liga ba edifísiu foun Pediátriku no ICCU nian ne’ebé mak agora daudaun iha hela konstrusaun husi Ministériu Saúde, atu hadi’a liután efisiénsia no seguransa pasiente nian iha servisu emerjénsia médiku nian.
Akordu Subvensaun husi projetu ba Melloria Hospitál Nasionál Guido Valadares (HNGV) asina entre Ministru Finansas no Reprezentante Xefe JICA iha loron 20 Agostu 2024, hodi fornese ajuda subvensaun to’o biliaun yen $3.093 ne’ebé ekivale ho dolar amerikanu millaun $20.
Projetu ne’e inklui konstrusaun edifísiu foun ida ba pasiente ambulatóriu haat, departamentu sala operasaun sira, Departamentu Fornesementu Estéril Sentrál, Departamentu Traballu no Partu, no departamentu obstetrísia no jinekolojia, no mós fornesimentu ekipamentu médiku sira.
Jornalista : Felicidade Ximenes
Editór : Cancio Ximenes
