DILI, 11 Maiu 2026 (TATOLI) – Sekretaria Estadu Kooperativa (SEkoop) no Kooprativa Multisetorál Komunidade Korenti, Karidade iha Timor (3K-T) asina akordu kona-ba sosa no fornese Bafo Kayrala (sorgo) iha Timor-Leste.
Asinatura akordu ne’e entre Diretór-Jerál SEKoop, Olderico Lopes, no Prezidente 3K-T, Idelfonso Pinto, no husi Sekretáriu Estadu Kooperativa, Arsénio Pereira, ne’ebé hala’o iha edifísiu SEKoop, iha Akait, Dili.
Arsénio Pereira hateten kooperasaun ne’e importante tebes tanba akordu ne’e atu fasilita 3K-T sosa produtu Bafo Kayrala iha munisípiu sira.
“Ida-ne’e hanesan gia ida ba sira atu sosa diretamente produtu Bafo Kayrala iha munisípiu sira, no ida-ne’e mós atu enkoraja ita-nia produtór sira ativu halo produsaun barak liután”, Arsénio Pereira hateten, ohin.
Nia salienta katak Bafo Kayrala rasik bele transforma ba dose, etu, trigu, no balun ba tua. Durante ne’e, produtór sira prodús maibé ema atu sosa ladún, tanba ne’e ho akordu bele iha kooperativa atu sosa.
Prezidente 3K-T, Idelfonso Pinto, agradese ba kooperasaun ho SEKoop, tanba objetivu husi akordu ne’e oinsá SEKoop bele fasilita sira bá iha to’os-na’in sira iha munisípiu.
“Durante ne’e ami iha hanoin ida atu hola Bafo ne’e, maibé ami labele hola direta iha terrenu tanba la hatene to’os-na’in hira mak prodús. Maibé, ho kooperasaun ne’e bele fasilita ami hatene produtór sira no hola sira-nia produtu”, nia dehan.
Nia esplika razaun sosa Bafo Kayrala ne’e tanba hakarak atu prosesa ba trigu, masin-midar, foos no hahán animál nian no seluk tan ho ekipamentu ne’ebé prontu atu prosesa ba produtu sira-ne’e. ne’ebé daudaun estabelese iha munisípiu Lautein, Likisá no Ainaru.
Akordu ne’e válidu hahú husi tinan 2026 to’o 2027. Parte rua tau importánsia atu hametin kadeia valór agríkola lokál, hasa’e rendimentu agrikultór sira no promove seguransa alimentár. Aleinde ne’e, konkorda atu serbisu hamutuk iha sosa, agregasaun no utilizasaun Bafo Kayrala iha territóriu tomak.
Objetivu husi akordu ne’e mak fasilita sosa no uza Bafo Kayrala atu halo ba produtu ai-han hanesan dosi, bolu/biskotu (bolinhos), no produtu prosesadu seluk hodi fornese ba restaurante no loja sira iha Timor-Leste.
Nune’e apoia inisiativa nasionál sira, inklui Programa Merenda Eskolár liuhoui uza produtu agríkola lokál, hametin sistema merkadu ne’ebé bazeia ba kooperativa no hasa’e asesu merkadu ba agrikultór ki’ik sira;
Aleinde ne’e apoia eventu kooperativa nasionál no rejionál sira ne’ebé organiza husi SEKoop tuir nia mandatu instituisionál, hametin seguransa ai-han iha rai-laran liuhusi promosaun produtu Bafo Kayrala.
Tuir akordu, mekanizmu sosa no halibur produtu mak parte rua konkorda 3K-T sei sosa diretamente Bafo Kayrala husi produtór sira ne’ebé iha produsaun liuhusi kilógrama 500 ba leten iha kada kolleta.
Maibé bele mós kolleta liuhusi SEKoop katak produtór sira ho produsaun ne’ebé menus husi 500 kg mai kraik sei entrega sira-nia produtu liuhusi serbisu munisipál SEKoop ba sentru kolleta ne’ebé determina ona. SEKoop sei fasilita koordenasaun, agregasaun no lojístika iha nivel munisipál.
Parte rua iha obrigasaun fasilita mobilizasaun agrikultór no kooperativa sira ba produsaun Bafo Kayrala, garante no apoia agrikultór no kooperativa sira hodi fornese Bafo Kayrala mínimu tonelada 20 kada epoka, ho posibilidade hodi fornese liu kuantidade ne’ebé mensiona.
“Ami planu atu sosa tonelada 120 kada tinan ho folin kada kilógrama ida $0,40. Ita garante pagamentu pontuál ba fornesedór sira tuir prosedimentu ne’ebé konkorda ona”, nia adianta.
Lembra katak, SEKoop kuda ona, iha tinan ne’e, Bafo Kayrala iha rai ektare hamutuk 189 iha munisípiu hotu.
Notisía relevante: SEKoop kuda Bafo Kayrala iha rai ektare 189
Jornalista: Arminda Fonseca
Editora: Maria Auxiliadora
