DILI, 09 Jullu 2025 (TATOLI)—Prezidente Federasaun Futeból Timor-Leste (FFTL), Nilton Telmo Gusmão, hateten konstrusaun Estádiu Futeból estandar Federation International Football Asosiation (FIFA) iha área Tasi-Tolu, Dili, sei la destroi fatin istóriku.
Notísia Relevante: FIFA kompromete disponibiliza millaun $3 konstrui Estádiu Munisipál Dili
“Estádiu ida ita harii iha Tasi-Tolu la’ós atu destroi fatin istóriku iha ne’ebá. Fatin istóriku nafatin fatin istóriku. Altar sira iha ne’ebá kontinua eziste. Konstrusaun mós la besik altar,” Nilton Telmo Gusmão hateten ba Agência Tatoli liuhusi programa “Entrevista Eskluziva” ho topiku “Dezafiu no progresu Dezenvolvimentu Fuetból iha Timor-Leste”, iha estúdiu Faról, tersa (08 Jullu 2025) ne’e.
Estádiu ne’e sei sai mós hanesan parke ida tanba nia lokaliza iha fatin ne’ebé luan, parke estasionamentu ne’ebé boot no ema-ne’ebé ba akompañ jogu no tuir atividade importante sira bele para karreta no motorizada.
“Bainhira ami dezenvolve projetu ne’e iha ne’ebá, ami konsiente katak buat sira-ne’e hanesan iha fatin santu, fatin istóriku, maibé ha’u fiar katak harii Estádiu ida iha ne’ebá la halakon istória no la halakon fatin ne’e nia santidade. Tanba Estádiu la mai atu sobu altar sira-ne’e, altar ita kontinua konserva, Estádiu ne’e harii husi parte sorin ida-ne’ebé parte mós husi Tasi-Tolu nian,” nia hateten.
Nia dehan, Estádiu ne’e nia funsaun la’ós de’it ba futeból, maibé bele hala’o atividade oioin iha fatin referidu.
“Estádiu ne’e, infraestrutura ida-ne’ebé la’ós de’it atu organiza futeból, atividade kulturál mós bele hala’o iha ne’ebá, misa ruma bele hala’o iha ne’ebá. Santu Padre Francisco kuandu ba Indonézia misa iha Estádiu no kuandu Santu Padre ba iha Papua Nova Guine misa iha Estádiu. Misa iha Estádiu ita-nia ema sira-ne’ebé partisipa tur ho di’ak-liu, laiha loromanas laran, di’ak ba ema,” Nilton tenik.
Entretantu, iha dezeñu ba Estádiu ne’e tau kedan rotunda boot ida iha Estádiu oin ne’ebé rezervadu atu harii fila-fali bandeira riin ne’ebé atu simboliza momentu restaura Timor-Leste nia independénsia iha tinan 2002.
“Se ita ko’alia katak fatin ne’e fatin istóriku uluk ita restaura ita-nia independénsia iha ne’ebá bandeira riin ne’e iha ne’ebé ona. Bandeira rin laiha ona, ema ida la ko’alia, agora ita hanoin atu halo mak ema hotu preokupa. Maibé buat hirak ne’e hotu ita konsidera, entaun rotunda ne’ebé iha Estádiu oin atu tau hikas istoria 2002 nian,” nia dehan.
Governu aprova konstrusaun Estádiu iha Timor-Leste
Governu Timor-Leste liuhusi reuniaun Konsellu Ministru, aprova ona proposta Federasaun Futebol Timor-Leste (FFTL) nian, ne’ebe atu halo reabilitasaun ba Estádiu Munisipál Dili no halo tán konstrusaun foun ba Estádiu ho kampu futsal indoor padraun internasionál iha Tasi-Tolu, Dili.
Proposta ne’e, hetan aprovasaun hafoin Prezidente FFTL, Nilton T. Gusmão dos Santos, Sekretáriu Jerál FFTL, José Adilson Ribeiro ho ekipa aprezenta iha reuniaun Konsellu Ministru, ne’ebe lidera direita husi Primeiru Ministru, Kay Rala Xanana Gusmão, iha loron 04 fulan-Juñu liu-ba.
Presiza halo reabilitasaun ba Estádiu Munisipál Dili, tanba estádiu irónika ne’ebé kle’ur ona sai sentru ba atividade futeból nasionál, nune’e presiza atualizasaun tuir kritériu sira iha padraun FIFA/AFC nian ba kompetisaun nasionál no internasionál sira.
Alende ne’e, presiza halo mós konstrusaun estádiu foun ida iha Tasi-Tolu, ne’ebé dezeña nu’udár instalasaun modernu ho padraun internasionál, hodi apoia kreximentu desportu nian, formasaun, no nu’udár uma-na’in ba torneiu rejionál no internasionál sira iha futuru.
Antes ne’e, Prezidente FFTL, Nilton Gusmão mós afirma inisiativa ne’e la’ós de’it fó apoiu ba dezenvolvimentu futeból iha Timor-Leste, maibé parte ida nu’udar orgullu nasionál, dezenvolvimentu desportu, turizmu ne’ebé bele kria mós impaktu sosio-ekonómiku, kria empregu no hametin papél desportu nu’udár instrumentu ida hodi halibur ema-hotu.
Desizaun ne’e marka kompromisu Governu nian hodi koloka desportu nu’udár parte integrante ba dezenvolvimentu nasionál, liuliu hodi prepara jerasaun foun no hasa’e Timor-Leste nia prezensa iha palku futeból internasionál.
Maske hala’o de’it mandatu tinan ida, maibé Prezidente FFTL mós afirma nia kompromisu atu fó impaktu substansiál durante nia lideransa.
Konstrusaun ba estádiu rua ne’e, tuir planu sei hahú iha tinan 2025, ho kompletasaun ne’ebé hein iha tinan 2026. Projetu ne’e sei implementa iha ámbitu Parseria Públiku-Privadu (PPP) entre FFTL ho Governu Timor-Leste liuhusi Ministériu Planeamentu Investimentu Estratéjiku (MPIE).
Reabilitasaun ba Estádiu Municipál Dili, ne’ebe atu aumenta tribuna parte leste ho 2.000 banku, no konstrusaun ba Estádiu foun ho kapasidade 15.300 tuur-fatin.
Notísia Relevante: Xina hakarak koopera ho Governu harii Estádiu padraun FIFA iha TL
Jornalista : Hortencio Sanchez
Editór : Cancio Ximenes
