DILI, 18 Marsu 2025 (TATOLI)–Ministru Juventude, Desportu, Arte no Kultura (MJDAK), Nelyo Isaac Sarmento, tersa ne’e, realiza enkontru ho delegasaun husi China Railway Urban Construction Group, LTD. (CRUCG) no China Northeast Architectural Design Research Institute Co. LTD, iha edifisiu MJDAK Dili.
Notísia Relevante: FIFA kompromete disponibiliza millaun $3 konstrui Estádiu Munisipál Dili
Iha enkontru ne’e diskute kona-ba dezeñu estádiu foun no Xina hakarak koopera ho Governu timor-Leste atu halo konstrusaun ba estádiu padraun Federation International Football Asosiation (FIFA) nian iha Timor-Leste.
Durante enkontru Ministru Nelyo Isaac apresia delegasaun Xineza nia aprezentasaun, hodi subliña signifikasaun husi projetu ne’e ba Timor-Leste nia dezenvolvimentu desportivu.
“Ha’u apresia ita-boot nia ideia sira no dezeñu kompreensivu estádiu nian ne’ebé ita aprezenta. Ami-nia ekipa tékniku sei akompaña delegasaun ba fatin ne’ebé propoin hodi avalia estrutura rai nian no analiza rai ne’e adekuadu ba konstrusaun estádiu, hodi konsidera kondisaun espesífiku sira Timor-Leste nian,” Ministru Nelyo hateten durante enkontru.
Delegasaun Xina ne’e mai ho dezeñu estádiu padraun FIFA nian ne’ebé propoin iha tribuna, fasilidade enkontru VIP, tuur-fatin públiku ba espetadór 13,177, estasionamentu VIP no públiku, no jardín sira-ne’ebé iha paisajen.
Vizita ba fatin ne’e sei permite delegasaun no tékniku MJDAK atu hadi’a liután dezeñu no rezolve dezafiu potensiál ruma relasiona ho terrenu no kondisaun lokál.
Konstrusaun estádiu padraun FIFA nian hanesan inisiativa xave ida ba MJDAK, ho objetivu atu hasa’e infraestrutura desportiva Timor-Leste nian no fornese fatin ba eventu desportivu nasionál no internasionál sira.
Projetu ida-ne’e reflete kompromisu Governu nian atu promove dezenvolvimentu juventude no haburas kultura desportu ne’ebé vibrante iha nasaun ne’e maibé ne’e foin mak dezeiñu ne’ebé delegasaun xineza aprezenta ba Governu.
Bainhira Governu aseita mak nasaun rua (Timor-Leste no Xina) bele koopera malu hodi konstrui Estádiu intarnasionál ida iha Timor-Leste.
Delegasaun ne’ebé kompostu hosi Guo Bing, Chen Jun, Zhu Hui (CRUCG), no Zhou Jun Qui, Yuan Yao Hua (China Northeast Architectural Design), aprezenta sira-nia dezeñu estádiu nian ba Ministru Nelyo Isaac no ofisiál sira MJDAK nian, inklui Xefe Gabinete Egas Barros Guteres Godinho no Diretora Nasionál Patrimoniu Lojístika no Infraestrutura (DNPLI), Maria Luisa Monteiro.
Notísia Relevante: FIFA apoiu millaun $1-resin konstrui kampu FFTL tuir padraun internasionál
Jornalista : Hortencio Sanchez
Editór : Cancio Ximenes
