DILI, 05 outubru 2023 (TATOLI) – Ministru Juventude Desportu Arte no Kultura (MJDAK), Nélio Isaac Sarmento, dehan Federation International Football Assosiation (FIFA) sei apoia osan hamutuk millaun $3 hodi konstrui Estádiu Munisipál Dili.
“FIFA iha komitmentu ona atu tau osan hamutuk millaun $3 atu hadia Estádiu Munisipál Dili, ida-ne’e orsamentu sira-nian, la’os Governu nian, Governu haree de’it orsamentu ne’ebé FIFA fó, karik la to’o Governu sei aumenta”, Nélio hatutan ba jornalista sira iha Palásiu Governu, kinta ne’e.
FIFA investe orsamentu ida-ne’e tanba Governu anteriór halo ona kompromisu ho Federasaun Futeból Timor-Leste (FFTL) no FIFA atu harii Estádiu ne’e ho nível internasionál.
“Uluk FIFA husu ba Governu atu oferese estatutu rai nian ba FIFA, entaun Governu anteriór oferese ona ba FFTL halo ona identifikasaun”, nia rekorda.
Governu ho FFTL daudaun ne’e halo hela diskusaun ho FIFA hodi haree nota entendimentu ne’ebé sei asina iha tempu besik.
“Análize legál ba nota entendementu iha ona, ita rasik mak haruka ba FIFA, sira la kestiona buat ida, entaun ita hein atu asina akordu”, nia relata.
FIFA sei haruka nia konsultan iha inísiu fulan ne’e, atu mai haree direta Estádiu Munisipál Dili ho objetivu atu halo konstrusaun bainhira asina ona akordu.
Governu deside atribui Estádiu Munisipál Dili ba FFTL
FIFA kompromete apoia FFTL dezenvolve futeból iha Timor-Leste
Nélio: Estádiu Dili Hosi Inísiu Prosesu Administrativu Sala
Estádiu Dili sei renova iha tinan oin
PM Taur konkorda entrega Estádiu Dili ba FFTL
Jornalista: Hortencio Sanchez
Editór : Zezito Silva
