iklan

INTERNASIONÁL, DESPORTU, DILI, HEADLINE

FIFA apoiu millaun $1-resin konstrui kampu FFTL tuir padraun internasionál

FIFA apoiu millaun $1-resin konstrui kampu FFTL tuir padraun internasionál

Imajen/espesial

DILI, 29 maiu 2024 (TATOLI)– Diretór Kompetisaun no Futeból Profisionál Federasaun Futeból Timor-Leste (FFTL), Frederico Martins, hateten, Federation International Football Assosiation (FIFA) aprova ona orsamentu hamutuk millaun $1-resin hodi konstrui kampu FFTL.

“Prosesu tenderizasaun no buat hotu hala’o husi FIFA, iha fulan kotuk FIFA deside ona fó ona kontratu ba empreza internasionál ida husi França mak ka’er, sira hahu ona halo servisu iha 27 Maiu ne’e,” Frederico katak ba Agência TATOLI iha edifisiu FFTL Dili, kuarta ne’e.

Daudaun konstrusaun kampu FFTL la’o hela.Imajen/Hortencio Sanchez

Projetu ne’e hala’o ho nia durasaun fulan ualu ho tipu tolu ne’ebé empreza halo mak hanesan, konstrui kampu futeból boot ida no ki’ik-rua no sei tau mós ho lampu ne’ebé padraun Asian Football Confederation (AFC).

“Projetu ne’e konstrui uluk ba buat tolu hanesan kampu tolu ne’e, tribun iha fali faze segundu tanba sei iha prosesu atu nune’e bele tuir padraun AFC no FIFA nian. Kampo tolu ne’ebé mak atu halo ne’e kampu ki’ik-rua ne’e ho boot ida ita utiliza nafatin sinteti sei la uza duut ho nia teknolojia modernu ne’ebé mistura ho rai-henek no boraxa metan, ne’ebé sei utiliza ba tempu naruk” nia katak.

Medida ba kampu boot ne’ebé konstrui naruk hamutuk metru 105, luan metru 74 kompleta ho baliza rua, kampu ki’ik naruk metru 65, luan metru 37 no ida fali luan metru 61 no luan metru 31.

“Kampu ki’ik rua ne’e sei utiliza ba juvenil sira hala’o treinamentu, kampu ida boot ne’e ita sei uza ba selesaun nasionál sira hala’o treinamentu no kopa FFTL nian ruma iha ita bele hala’o iha ne’e,” nia katak.

Projetu ne’e konstrui husi empreza internasionál Edel Grass JV husi nasaun França ne’ebé hili direita husi FIFA no iha mós empreza lokál ida ne’ebé Sub mak Hedge Construction Unipessoal, Lda.

Notisia relevante:Reabilitasaun Estádiu Munisipál Dili, FFTL-FIFA hein kontratu hosi SEJD

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!