DILI, 10 Jullu 2025 (TATOLI)—Sekretáriu Ezekutivu Sekretariadu Tékniku Programa Nasionál Dezenvolvimentu Suku (ST- PNDS), Amandio Paulino Gastão do Rosário de Sousa, hateten programa Uma Naroman ba Povu (UNP) anteriór atinje ona pursentu 98 iha territóriu nasionál.
“Ha’u atu ko’alia loloos katak konstrusaun UNP atinje ona 98%,” Sekretáriu Ezekutivu dehan iha Ministériu Negósiu Estranjeiru no Kooperasaun (MNEK), Prais dos Coqueiros, Dili, kinta ne’e.
Nia dehan programa ne’e VIII Governu Konstitusionál mak aplika no maski programa referidu iha Governu atuál la eziste ona maibé ekipa ST-PNDS kontinua halo monitorizasun ba obra sira-ne’e.
“Ami só halo monitorizasaun. Maibé, tuir ami-nia monitorizasaun katak tinan ne’e bele finaliza bainhira tempu bailoron. Iha bailoron ne’e komunidade no autoridade komunitária suku sira esforsu bele finaliza ona,” nia garante.
Nia klarifika katak Sekretariadu Tékniku PNDS só halo monitorizasaun ba UNP iha munisípiu sira oinsá atu aselera projetu referidu.
“Ida-ne’e akontese tanba udan no estrada ladi’ak hodi transporta materiál konstrusaun bá fatin ne’ebé projetu hirak-ne’e harii ba,” Amandio haktuir.
Governu Timor-Leste aloka ona millaun $188,9 hosi Orsamentu Estadu 2021, 2022 no 2023 hodi konstrui UNP hamutuk 9.854 iha Timor-Leste (TL).
Totál UNP hamutuk 9.854 konstruidu iha territóriu laran durante lideransa Primeiru-Ministru, Taur Matan Ruak iha VIII Governu Konstitusionál.
Jornalista : Osória Marques
Editora : Julia Chatarina
